
Творчая сустрэча з артыстам заслужанага калектыву «Беларускі тэатр “Лялька”» вядучым майстрам сцэны Алесем Маханьковым
- Details
- Створана 25.11.2013 08:24
14 лістапада ў аддзеле літаратуры па мастацтве адбылася юбілейная творчая сустрэча з артыстам заслужанага калектыву «Беларускі тэатр "Лялька"», вядучым майстрам сцэны Алесем Маханьковым.
Аляксандр Леанідавіч працуе ў «Ляльцы» амаль з дня яе заснавання – з 1986 года. На яго рахунку каля 60 роляў у спектаклях для маленькіх і дарослых. За час свайго тэатральнага жыцця ён прыняў удзел прыкладна ў 50 міжнародных фестывалях, дзе разам з калектывам атрымаў Гран-пры (3), прызы (6) за лепшыя спектаклі. А на Міжнародным фестывалі дзіцячых тэатраў у Сербіі і Чарнагорыі яго роля Блазна ў спектаклі «Брэменскія музыкі» была прызнана лепшай мужчынскай роляй. У 2013 годзе Аляксандр Леанідавіч атрымаў вышэйшую акцёрскую ўзнагароду Беларускага саюза тэатральных дзеячаў «Крыштальны анёлак».
Падчас сустрэчы Алесь Маханькоў даў магчымасць усім прысутнічым зазірнуць ў свет тэатра лялек. Паказаў, што не толькі фактура артыста (голас, знешнія дадзеныя), але і ўменне зжыцца з лялькай, кіраваць разнастайнымі лялечнымі сістэмамі ляжыць у аснове поспеху лялечніка. Увазе прыхільнікаў тэатра былі прадстаўлены ўрыўкі са спектакляў «Дзядзька Ваня і сястры тры», «Адважныя браты», «Загубленая душа...».
Але Алесь Маханькоў вядомы не толькі як артыст Беларускага тэатра «Лялька». Аб астатніх гранях яго таленту і інтарэсах гледачы даведаліся з відэа М. Клімчука. Артыст, вандроўнік, спартсмен, выкладчык каледжа культуры і мастацтваў... І на сустрэчу з ім завіталі студэнты каледжа з нумарам, падрыхтаваным пад кіраўніцтвам свайго настаўніка.
На вечары госці мелі мажлівасць задаць пытанні любімаму артысту, прагледзець фотагалерэю з момантамі не толькі мінулага і цяперашняга часу, але і нават будучыні Алеся Маханькова.


































