
Творчая сустрэча з пісьменніцай Людмілай Рублеўскай
- Details
- Створана 09.06.2014 14:39
7 чэрвеня ў бібліятэцы адбылася творчая сустрэча з беларускай паэтэсай, пісьменніцай, журналісткай, літаратурным крытыкам Людмілай Рублеўскай.
З прывітальным словам выступіў пісьменнік Франц Сіўко, які адзначыў, што Людміла Рублеўская працуе надзвычай плённа, і папрасіў Людмілу Іванаўну падзяліцца сакрэтамі свайго творчага плёну.
Пісьменніца пагадзілася з тым, што, сапраўды, апошнім часам у яе добра пішацца проза, а некаторыя літаратурныя героі проста «не даюць спакою» і літаральна пачынаюць ужо «жыць сваім жыццём», як героі трылогіі пра прыгоды Пранціша Вырвіча, застаецца толькі запісваць пра іх. Выйшла ў свет другая кніга трылогіі «Авантуры студыёзуса Вырвіча» і ўжо гатова да друку трэцяя кніга.
Людміла Іванаўна расказала таксама пра сваю сумесную працу з гісторыкам, літаратуразнаўцам Віталем Скалабанам, вынікам якой стала выданне кнігі «Время и бремя архивов и имен», і прачытала верш, прысвечаны памяці гэтага выбітнага навукоўцы.
Вялася шчырая, нязмушаная гаворка пра крыніцы натхнення, побыт і творчасць, шлях у літаратуру, журналісцкую працу… З прыязнасцю Людміла Рублеўская ўспомніла пра свае вандроўкі па Віцебску з Давідам Сімановічам, сумесную працу з тэатрам імя Якуба Коласа.
Прысутныя на сустрэчы маглі азнаёміцца з творамі Людмілы Рублеўскай на выставе «Мы вернемся на Беларусь…», наладжанай супрацоўнікамі аддзела краязнаўчай літаратуры і бібліяграфіі.
За цікавай размовай час праляцеў вельмі хутка, і ўдзельнікі вечарыны выказалі спадзяванне на новыя сустрэчы з гэтым таленавітым аўтарам і прыязным чалавекам.


































