
Да 215-годдзя з дня нараджэння А.С. Пушкіна: літаратурная вечарына «Тропа к Пушкину»
- Details
- Створана 09.06.2014 14:30
5 чэрвеня ў Віцебскай абласной бібліятэцы адбыўся літаратурны вечар, прысвечаны А. С. Пушкіну і прымеркаваны да 215-годдзя з дня нараджэння паэта.
Цэнтральнай падзеяй мерапрыемства стала прэзентацыя факсімільнага выдання з фонду абласной бібліятэкі «А. С. Пушкін. Болдзінскія рукапісы 1830», падрыхтаваная вядучым бібліятэкарам агульнай чытальнай залы Н. В. Абрамовіч. Выданне падрыхтавана Інстытутам рускай літаратуры РАН сумесна з выдавецтвам «Альфарэт» пры падтрымцы Пастаяннага Камітэта Саюзнай дзяржавы і выпушчана выдавецтвам Пушкінскага Дома сумесна з Форумам лідэраў бізнесу пад эгідай прынца Уэльскага. Тыраж яго складае ўсяго 500 асобнікаў. 6 лютага 2014 года Дзяржсакратар Саюзнай дзяржавы Рыгор Аляксеевіч Рапота на ўрачыстай цырымоніі ў Мінску перадаў выданне ў дар Нацыянальнай бібліятэцы Рэспублікі Беларусь і абласным бібліятэкам.
Прысутныя ў зале навучэнцы і студэнты, супрацоўнікі бібліятэк г. Віцебска, прадстаўнікі СМІ мелі магчымасць пагартаць унікальнае выданне, а таксама азнаёміцца з літаратурай пра жыццё і творчасць А. С. Пушкіна, прадстаўленай на кніжнай выставе.
У арганізацыі і правядзенні мерапрыемства прынялі ўдзел дырэктар ДУА «Гімназія № 3 імя А. С. Пушкіна г. Віцебска» Людміла Васільеўна Сомава, старшыня Віцебскага абласнога аддзялення Саюза пісьменнікаў Беларусі Тамара Краснова-Гусачэнка, паэты Алена Крыклівец і Уладзімір Крайнеў, якія адзначылі значэнне творчай спадчыны паэта ў сучасным свеце і ўшанавання яго памяці ў г. Віцебску.
Юбілейнае мерапрыемства завяршылася ля помніка А. С. Пушкіну, дзе для аматараў мастацкага слова было арганізавана свята паэзіі.


































