
Выстава жывапісу Галіны Васільевай «Гарадскі раманс»
- Details
- Створана 08.08.2014 09:10
5 жніўня ў бібліятэцы адбылося адкрыццё выставы жывапісу члена Саюза мастакоў Рэспублікі Беларусь Галіны Васільевай «Гарадскі раманс».
Галіна Сцяпанаўна нарадзілася ў горадзе Полацку. У 1982 годзе скончыла мастацка-графічны факультэт Віцебскага дзяржаўнага педагагічнага інстытута. З 1989 года сябра творчага аб’яднання «4-63». Выкладае на кафедры дызайну Віцебскага дзяржаўнага тэхналагічнага ўніверсітэта. Працы Галіны Васільевай знаходзяцца ў музеях, прыватных зборах, галерэях Латвіі, Германіі, Англіі, Ізраіля, Польшчы, ЗША, Літвы, Беларусі, Расіі. Яна з’яўляецца куратарам і ўдзельнікам шматлікіх міжнародных праектаў у Англіі, Польшчы, Літве, Расіі.
На выставе, адкрыццё якой прайшло ў нетрадыцыйнай форме, больш падобнай на пасяджэнне мастацка-эстэтычнага салона «ОЛИ-art», прадстаўлены гарадскія пейзажы. Галіна Сцяпанаўна прысвяціла свае працы Полацку, Віцебску. Раманс – гэта лірыка, пачуццёвасць, паэтыка. Такім чынам глядзіць яна на Горад, такім бачыць яго вуліцы, храмы. Выступіўшая на адкрыцці выставы доктар мастацтвазнаўства, прафесар Таццяна Віктараўна Катовіч раскрыла ўсе грані таленту Галіны Васільевай, мастака, педагога, чалавека.
У аддзеле літаратуры па мастацтве дзейнічае яшчэ адна выстава – кніжна-ілюстрацыйная, на якой можна пазнаёміцца з творчасцю Галіны Васільевай праз энцыклапедыі, кніжныя выданні, перыёдыку, буклеты, каталогі выстаў.


































