
Вечарына «Душа ніколі не старэе!» да 80-годдзя У.А. Папковіча
- Details
- Створана 14.04.2015 08:27
9 красавіка ў аддзеле краязнаўчай літаратуры і бібліяграфіі адбылася вечарына «Душа ніколі не старэе!» да 80-годдзя Уладзіміра Антонавіча Папковіча.
Віншаванне, дасланае юбіляру Інстытутам імя Гётэ ў Мінску, зачытала дырэктар Віцебскай абласной бібліятэкі Таццяна Мікалаеўна Адамян.
Прэзентацыя з фотаздымкамі нібы вярнула паэта ў дзіцячыя і студэнцкія гады, і ён расказваў пра родную вёску Дварэц на Міншчыне, першае каханне і студэнцтва, першыя крокі ў якасці перакладчыка.
Да свайго юбілею Уладзімір Папковіч выпусціў новую кнігу «Як ёсць...» і падчас мерапрыемства гучалі вершы як з гэтай кнігі, так і даўнія, ужо палюбіўшыяся чытачам. Напомніўшы прысутным пра свайго лірычнага героя Ахрэма Нядбайлу, ад імя якога было напісана шмат вершаў, Уладзімір Папковіч таксама чытаў свае гумарыстычныя карацелькі.
Зала аддзела краязнаўчай літаратуры і бібліяграфіі ледзь змясціла ўсіх, хто прыйшоў павіншаваць паэта, перакладчыка, педагога з юбілеем. Студэнты і былыя вучні, калегі, прадстаўнікі творчай інтэлігенцыі горада, бібліятэкары, прыхільнікі творчасці паэта, сябры вельмі душэўна і шчыра выказвалі словы ўдзячнасці і павагі юбіляру. Многія з выступоўцаў адзначалі дабрыню, чалавечую годнасць, душэўную маладосць, прыстойнасць Уладзіміра Антонавіча. Прыемнай нечаканасцю для выкладчыка было відэавіншаванне, дасланае з Венецыі яго былой студэнткай Веранікай Кучынскай.
Напрыканцы сустрэчы аўтар падпісаў прысутным свой новы зборнік вершаў.


































