
Прэзентацыя кнігі Міхася Конана «Юргінія»
- Details
- Створана 03.04.2015 09:51
31 сакавіка ў аддзеле краязнаўчай літаратуры і бібліяграфіі адбылася прэзентацыя рамана журналіста, пісьменніка Міхася Конана «Юргінія».
Доўгія гады свайго жыцця Міхась Сямёнавіч прысвяціў журналісцкай рабоце: з 1976 года ён працаваў у газеце «Віцебскі рабочы», а з 1991 па 2006 – у газеце «Віцьбічы». Героямі публікацый Міхася Конана часта станавіліся працаўнікі вёскі, руплівыя гаспадары, якіх ён сустракаў падчас рабочых паездак па Віцебскай вобласці. Тэма беларускай вёскі знайшла свой працяг у вялікім, значным творы – рамане «Юргінія». Аўтар расказаў прысутным на прэзентацыі пра свой доўгі шлях да напісання гэтага твора.
Пра распрацоўку тэмы заходнебеларускай вёскі ў беларускай літаратуры, няпростым лёсе вяскоўца-працаўніка, пра мастацкія вартасці кнігі гаварылі загадчык кафедры беларускай літаратуры Віцебскага дзяржаўнага ўніверсітэта Вольга Іванаўна Русілка, старшы выкладчык кафедры беларускай літературы Ірына Вацлаваўна Саматой, дацэнт Віцебскага дзяржаўнага ўніверсітэта Васіль Мікалаевіч Баранок, Ганаровы член Віцебскага абласнога адзялення Саюза пісьменнікаў Беларусі Барыс Паўлавіч Беляжэнка.
Сваімі ўражаннямі ад прачытання рамана падзяліўся рэдактар кнігі – вядучы артыст Беларускага акадэмічнага драматычнага тэатра імя Якуба Коласа Пётр Ламан.
З цікавасцю паслухалі ўдзельнікі мерапрыемства водгук на раман «Юргінія», які напісаў прафесар Віцебскага дзяржаўнага ўніверсітэта, мастак Вячаслаў Вячаслававіч Шамшур.
З добрым словам да калегі, сябра, настаўніка звярнуліся журналіст Ніна Пісарэнка, дацэнт Віцебскага дзяржаўнага ўніверсітэта Алег Шчыгельскі, былы вучань Міхася Конана Анатоль Смірноў.
Матэрыялы выставы з кнігамі, фотаздымкамі, публікацыямі аўтара, наладжанай супрацоўнікамі аддзела краязнаўчай літаратуры і бібліяграфіі, пазнаёмілі ўсіх прысутных з вехамі жыццёвага і творчага шляху Міхася Конана.
Раман нашага земляка, выдадзены ў 2014 годзе, ужо прыцягнуў увагу чытачоў Віцебскай абласной бібліятэкі.


































