
Сустрэча з прадстаўнікамі РВУ «Выдавецкі дом “Звязда”» – супрацоўнікамі рэдакцыі часопіса «Неман»
- Details
- Створана 03.04.2015 14:09
7 красавіка ў бібліятэцы адбылася сустрэча з прадстаўнікамі РВУ «Выдавецкі дом "Звязда"» супрацоўнікамі рэдакцыі часопіса «НЕМАН», прысвечаная 70-годдзю выдання.
Гасцямі абласной бібліятэкі сталі галоўны рэдактар часопіса Алесь Чарота, рэдактар аддзела прозы Алег Ждан, рэдактар аддзела паэзіі і літаратурнай крытыкі Наталля Казапалянская, рэдактар аддзела замежнай літаратуры Анатоль Казлоў.
Пазнаёміўшы прысутных на сустрэчы з гісторыяй і традыцыямі «Немана», Алесь Чарота расказаў пра новае ў афармленні і змесце часопіса. Адзін са старэйшых супрацоўнікаў «Немана» пісьменнік Алег Ждан асобна адзначыў тэму 70-годдзя Вялікай Перамогі, якая праходзіць як галоўная праз шэраг апошніх нумароў часопіса. Удзельнікі мерапрыемства таксама паслухалі ўрывак з новай кнігі аўтара. Сваімі разважаннямі пра ролю сур'ёзных літаратурных часопісаў у выхаванні чытача падзялілася літаратуразнаўца і паэтэса Наталля Казапалянская. Пісьменнік Анатоль Казлоў расказаў пра працу аддзела замежнай літаратуры і пра адбор твораў для публікацыі ў часопісе.
З юбілеем часопіс «Неман» прыйшлі павіншаваць віцебскія літаратары – лаўрэаты Літаратурнай прэміі імя П. Броўкі за 2014 год Барыс Беляжэнка, Мікалай Намеснікаў, Святлана Гук. Добрыя пажаданні часопісу-юбіляру таксама прагучалі ад супрацоўнікаў бібліятэк горада і чытачоў.
Старонкі гісторыі часопіса «Неман» былі прадстаўлены ўвазе ўдзельнікаў мерапрыемства на выставе, арганізаванай супрацоўнікамі аддзела краязнаўчай літаратуры і бібліяграфіі.


































