
Міжнародная навукова-практычная канферэнцыя, прысвечаная 170-годдзю з дня нараджэння М. Я. Нікіфароўскага
- Details
- Створана 11.11.2015 13:33
5 лістапада ў ДУ «Віцебская абласная бібліятэка імя У. І. Леніна» адбылася Міжнародная навукова-практычная канферэнцыя, прысвечаная 170-годдзю з дня нараджэння даследчыка, этнографа, краязнаўца Мікалая Якаўлевіча Нікіфароўскага.
Арганізатарамі канферэнцыі выступілі Віцебская абласная бібліятэка, Віцебскі абласны краязнаўчы музей і Віцебскі дзяржаўны ўніверсітэт.
З прывітальным словам да ўдзельнікаў канферэнцыі звярнуліся намеснік начальніка галоўнага ўпраўлення ідэалагічнай работы, культуры і па справах моладзі Ларыса Канстанцінаўна Аленская, дырэктар Віцебскай абласной бібліятэкі Таццяна Мікалаеўна Адамян, загадчык кафедры гісторыі Беларусі Віцебскага дзяржаўнага ўніверсітэта імя П. М. Машэрава, кандыдат гістарычных навук Анатоль Мікалаевіч Дулаў, намеснік дырэктара Віцебскага абласнога краязнаўчага музея па навуковай рабоце Валерый Аляксеевіч Шышанаў.
Для ўдзелу ў канферэнцыі было пададзена больш за 70 заявак ад краязнаўцаў, гісторыкаў, супрацоўнікаў музеяў, бібліятэк, вышэйшых навучальных устаноў з Беларусі, Расіі, Украіны, Латвіі, Азербайджана. Сярод беларускіх удзельнікаў канферэнцыі былі прадстаўнікі Мінска, Віцебска, Гомеля, Магілёва, Барысава, Полацка, раённых цэнтраў Мінскай і Віцебскай абласцей. Каля 50 выступоўцаў прынялі ўдзел у рабоце наступных секцый: «Гістарычнае краязнаўства», «Літаратурнае краязнаўства і мастацкая культура», «Культурна-асветніцкія ўстановы ў сістэме сучаснага краязнаўства», «Рэлігійнае жыццё Віцебскага краю: гісторыя і сучаснасць». Шырокая тэматыка дакладаў, прадстаўленых на секцыях, закранала разнастайныя пытанні краязнаўства, этнаграфіі, фалькларыстыкі.
Галоўнай тэмай, якая прайшла праз усё мерапрыемства, стала тэма вывучэння, захавання і папулярызацыі багатай спадчыны Мікалая Якаўлевіча Нікіфароўскага. Пра малавядомыя працы М. Я. Нікіфароўскага паведаміў краязнаўца Аркадзь Міхайлавіч Падліпскі, тэма яго выступлення была працягнута вядучым навуковым супрацоўнікам Віцебскага абласнога краязнаўчага музея Наталляй Юр'еўнай Шаркоўскай у дакладзе «Н. Я. Никифоровский как первый исследователь археологических «гончарных терракот Витебска». Прыклады выкарыстання фальклорна-этнаграфічнай спадчыны Нікіфароўскага прыводзілі ў сваіх выступленнях дацэнт кафедры музыкі Віцебскага дзяржаўнага ўніверсітэта, кандыдат педагагічных навук Юліяна Самсонаўна Сусед-Вілічынская, загадчык аддзела спорту, турызму, экалогіі і краязнаўства цэнтра дзяцей і моладзі Віцебскага раёна Людміла Канстанцінаўна Нікіціна, дацэнт кафедры гісторыі Беларусі Віцебскага дзяржаўнага ўніверсітэта, кандыдат гістарычных навук Мікалай Васільевіч Півавар. Праца Мікалая Якаўлевіча Нікіфароўскага як даследчыка Віцебскай Беларусі была разгледжана яшчэ ў шэрагу дакладаў.
На выставе «Пачынальнік беларускага народазнаўства» былі прадстаўлены працы М. Я. Нікіфароўскага з фонду Віцебскай абласной бібліятэкі, матэрыялы пра нашага знакамітага земляка, а таксама «віцебскія тэракоты» (фрагменты ізразцоў, посуд), што былі знойдзены пры раскопках, з фонду Віцебскага абласнога краязнаўчага музея.
Па матэрыялах канферэнцыі будзе выдадзены зборнік артыкулаў.
Арганізатары канферэнцыі выказваюць падзяку за дапамогу пры падрыхтоўцы і правядзенні канферэнцыі ААА «Галтеяфарм», КУП «Віцьба» и санаторыю «Лётцы».


































