
Творчая сустрэча з Францам Сіўко
- Details
- Створана 25.01.2016 10:05
21 студзеня ў бібліятэцы адбылася творчая сустрэча з пісьменнікам, публіцыстам, лаўрэатам літаратурнай прэміі імя Уладзіміра Караткевіча Францам Сіўко.
Франц Сіўко адзін з самых цікавых і арыгінальных сучасных празаікаў. Аўдыёзапіс з меркаваннямі крытыкаў пра творчасць Франца Сіўко прагучаў у пачатку вечарыны. Адзначыўшы станоўчае стаўленне да крытыкі, Франц Іванавіч вёў гаворку пра свае кнігі. Ён расказаў пра прататыпы сваіх твораў, некаторыя з прататыпаў можна было пабачыць на прадстаўленых увазе прысутных фотаздымках, пра падзеі, што падштурхнулі да напісання пэўных твораў. Таксама Франц Іванавіч прадставіў сваю новую кнігу «Плебейскія гульні» і расказаў гісторыю яе стварэння.
Амаль два дзесяцігоддзі Франц Сіўко аддаў працы настаўніка, выкладчыка. З гумарам успамінаючы некаторыя выпадкі з часоў настаўніцтва, пісьменнік адзначыў сваю прыхільнасць да выкладчыцкай дзейнасці. Працягам гэтай работы можна ў пэўнай ступені лічыць праект Франца Сіўко «Кожны талент ад Бога», сустрэчы ў межах якога штомесячна адбываюцца ў культурна-рэлігійным цэнтры віцебскага кафедральнага касцёла Езуса Міласэрнага.
З выхадам у свет новай кнігі Франца Сіўко павіншавала старшыня Віцебскага аддзялення Саюза беларускіх пісьменнікаў Анастасія Лазебная. Гітарны акампанемент музыканта Аляксандра Салавяна радаваў прысутных на працягу вечарыны.


































