
Вечар «Эль Лисицкий – творец проунов», прысвечаны 125-годдзю з дня нараджэння Л. М. Лісіцкага
- Details
- Створана 13.11.2015 09:39
12 лістапада ў аддзеле літаратуры па мастацтве ў рамках мастацка-эстэтычнага салона «ОЛІ-Аrt» адбыўся вечар «Эль Лисицкий – творец проунов», прысвечаны 125-годдзю з дня нараджэння мастака і архітэктара Лазара Маркавіча Лісіцкага.
Адкрыў вечар старшыня салона «ОЛІ-Аrt» Уладзімір Джарыані. Вядучы вечара – кандыдат мастацтвазнаўства, дацэнт кафедры ўсеагульнай гісторыі і сусветнай культуры Віцебскага дзяржаўнага ўніверсітэта імя П. М. Машэрава Аляксандр Лісаў пазнаёміў прысутных з цікавымі фактамі з творчай біяграфіі Л. М. Лісіцкага. Аповед быў праілюстраваны фотадакументамі і ўрыўкамі з дакументальнага фільма. Дацэнт кафедры дызайну Віцебскага дзяржаўнага тэхналагічнага ўніверсітэта, член Беларускага саюза дызайнераў Наталля Тарабука, студэнты ўніверсітэта, мастак Аляксандр Малей, культуролаг, заснавальнік «Цэнтра сучасна мастацтва» Валянціна Кірылава расказалі пра ўплыў творчасці Л. М. Лісіцкага на іх разуменне мастацтва. У выкананні піяніста Віцебскай абласной філармоніі Уладзіслава Сярпінскага прагучалі мініяцюры С. Пракоф'ева і К. Дэбюсі.
На кніжна-ілюстрацыйнай выставе, аформленай у аддзеле літаратуры па мастацтве, удзельнікі вечара атрымалі магчымасць пазнаёміцца з дакументамі з фондаў абласной бібліятэкі і асабістай бібліятэкі Н. Тарабука. Гэта факсімільныя выданні, якія ілюстраваў Л. М. Лісіцкі, а таксама выданні, у тым ліку рэдкія, што выйшлі на замежных мовах у другой палове 20 стагоддзя, прысвечаныя жыццю і творчасці мастака.
У аддзеле літаратуры па мастацтве на працягу месяца будзе працаваць выстава творчых работ студэнтаў кафедры дызайну «Дызайн – гэта канструктывізм», якая была адкрыта ў рамках мерапрыемства і прымеркавана да юбілею Лазара Маркавіча Лісіцкага.


































