
Творчая сустрэча з Уладзімірам Папковічам «50 год у Віцебску. Давайце шчыра пагаворым…»
- Details
- Створана 29.03.2016 10:09
24 сакавіка ў бібліятэцы ў рамках цыкла «Краязнаўчыя сустрэчы» адбылася творчая сустрэча з пісьменнікам, перакладчыкам, педагогам Уладзімірам Антонавічам Папковічам «50 год у Віцебску. Давайце шчыра пагаворым...».
50 гадоў назад, у 1966 годзе, у Віцебск пераехаў выкладчык нямецкай мовы Уладзімір Папковіч. На вечарыне ён расказаў пра горад, напоўнены сябрамі. Анатоль Канапелька, Давід Сімановіч, Фелікс Гумен, Сяргей Рублеўскі, Віталь Раўза, многія віцебскія мастакі і літаратары – людзі, якія падтрымлівалі раней і падтрымліваюць паэта сёння. Вечарына пачалася музычным віншаваннем ад сям'і Раўза. Уладзімір Антонавіч успамінаў пра паездкі ў Германію разам з народным маладзёжным хорам пад кіраўніцтвам Віталя Раўза, з вялікай удзячнасцю гаварыў пра падтрымку з боку Рыгора Барадуліна ў выданні свайго першага зборніка вершаў. Кнігі з аўтографамі народнага паэта вельмі дарагія Уладзіміру Антонавічу.
Паэт чытаў свае вершы, расказваў пра працу выкладчыка, якой прысвяціў амаль 60 гадоў, разважаў пра былых і сённяшніх студэнтаў. Прыемным сюрпрызам для ўсіх стаў невялікі ўрывак дакументальнай кінахронікі з выступленнем маладога выкладчыка Уладзіміра Папковіча, кінахроніку адшукала і падаравала Уладзіміру Антонавічу яго калега, літаратуразнаўца, паэтэса Вольга Русілка. У выступленнях пісьменніка Сяргея Рублеўскага, мастака Фелікса Гумена падкрэсліваліся годнасць, добразычлівасць, адданасць справе і павага да людзей, уласцівыя Уладзіміру Папковічу.


































