
Краязнаўчыя сустрэчы «Мой любы край, маё Заронава»
- Details
- Створана 12.06.2016 06:01
9 чэрвеня ў бібліятэцы ў межах цыкла «Краязнаўчыя сустрэчы» адбылася вечарына, прысвечаная 30-годдзю стварэння музея «Гісторыя Заронаўскага краю». Падчас вечарыны прайшла прэзентацыя кнігі кіраўніка музея, краязнаўцы Людмілы Канстанцінаўны Нікіцінай «Мой любы край, маё Заронава».
Каб пазнаёміць усіх прысутных з маляўнічым кутком Віцебскага краю, была паказана дакументальная стужка «Наша Заронава». Музей «Гісторыя Заронаўскага краю» багаты на экспазіцыі. Ёсць залы «Настальгія», «Калекцыйная», «Хата-чытальня», а ў 2014 годзе расчынілі свае дзверы «Зала беларускай міфалогіі» і «Паветка». Юныя экскурсаводы Захар і Валерыя Варган, Мікіта Шыбека, Аляксандра Гвоздзева з дапамогай электроннай прэзентацыі правялі віртуальную экскурсію па залах музея.
Людміла Нікіціна расказала пра стварэнне экспазіцыі музея, пра вялікую пошукавую працу па ўвекавечанні памяці загінуўшых у гады Вялікай Айчыннай вайны. На вечарыне выступілі героі кнігі «Мой любы край, маё Заронава»: ганаровы грамадзянін Заронаўскага сельскага Савета, ініцыятар стварэння музея, фундатар многіх музейных праектаў Валерый Бермант, вучаніца Людмілы Канстанцінаўны, загадчык Заронаўскага дзіцячага сада Зоя Пека.
Заронаўскі музей па-сяброўску ветліва адчыняе свае дзверы ўсім, хто цікавіцца гісторыяй роднага краю. Сяброў за гэтыя гады ў музея з'явілася вельмі многа. Некаторыя з іх прыйшлі на вечарыну з падарункамі. Больш за 2 тысячы рэчаў падарыў музею Вадзім Кузьмін, і ў дзень прэзентацыі ён прынёс у падарунак вагі і дымакур. Турысцкі заплечнік музей атрымаў ад Ніны Сулецкай. Пісьменнік Міхась Мірановіч прачытаў свае гумарыстычныя карацелькі-міранізмы.
Словы падзякі Людміле Нікіцінай за яе руплівую працу гучалі ў віншаваннях старшыні праўлення Віцебскага абласнога аддзялення ГА «Беларускі фонд міру» Таццяны Туманавай, старшыні Віцебскай раённай арганізацыі прафсаюза работнікаў адукацыі і навукі Сяргея Анікеева, загадчыка Віцебскага раённага краязнаўчага музея Ларысы Якаўлевай.
Цудоўным падарункам для ўсіх удзельнікаў імпрэзы сталі песні ў выкананні вучаніцы Суйкаўскай сярэдняй школы Аляксандры Гвоздзевай.


































