
Бясплатныя курсы «Віцебск: рэальная і папулярная гісторыя роднага горада». «Княгіня Вольга – легендарная заснавальніца горада Віцебска»
- Details
- Створана 26.09.2016 12:04
29 верасня ў бібліятэцы адбыўся чарговы занятак у рамках бясплатных курсаў «Віцебск: рэальная і папулярная гісторыя роднага горада». Занятак быў прысвечаны памяці дэкана гістарычнага факультэта ВДУ імя П. М. Машэрава Валерыя Міхайлавіча Шораца.
У ходзе занятка былі разгледжаны пытанні этнічнай гісторыі на беларускіх землях перыяду першага тысячагоддзя нашай эры. Невялікую лекцыю па гэтай тэме правёў кандыдат гістарычных навук, дацэнт кафедры гісторыі Беларусі ВДУ імя П. М. Машэрава Мікалай Пархімовіч, які не толькі асвяціў асноўныя канцэпцыі паходжання індаеўрапейцаў, але і параіў найбольш аўтарытэтныя крыніцы па пытаннях этнічнай гісторыі.
Галоўнай тэмай сустрэчы стала абмеркаванне легенды пра заснаванне Віцебска княгіняй Вольгай і верагоднай даты заснавання горада. У выступленнях кандыдатаў гістарычных навук Дзяніса Юрчака і Анатоля Дулава былі закрануты праблемы фарміравання першых гарадоў на ўсходнеславянскіх землях, летапіснага ўпамінання пра княгіню ў Віцебскім летапісе, першага ўпамінання пра Віцебск у старажытных тэкстах і пытанні даціроўкі заснавання горада.
Намеснік дырэктара па навуковай рабоце Віцебскага абласнога краязнаўчага музея Валерый Шышанаў расказаў пра сваю работу з арыгіналам Віцебскага летапісу з мэтай выяўлення года заснавання горада. Сумесная праца з гісторыкам Максімам Макаравым дазволіла Валерыю Аляксеевічу выявіць упамінанне пра заснаванне княгіняй Вольгай Дабравешчанскай царквы ў Віцебску ў «Историко-юридических материалах, извлеченных из актовых книг губерний Витебской и Могилевской» (1891). Гэта і іншыя крыніцы канца XVIII–ХІХ стагоддзяў сведчаць пра шырокае бытаванне легенды пра княгіню Вольгу ў Віцебску да напісання Віцебскага летапісу.
Кіраўнік клуба гістарычнай рэканструкцыі «Vargentorn» Макар Бабенка выказаў меркаванне, што прыгожая легенда пра заснаванне Віцебска княгіняй Вольгай можа стаць сапраўдным брэндам горада, як з'яўляюцца брэндамі легенды пра заснаванне Рыма, Вільні і іншых гарадоў.
З літаратурай, якая рэкамендавана для больш глыбокага вывучэння тэмы, можна пазнаёміцца ў аддзеле краязнаўчай літаратуры і бібліяграфіі.


































