
Віцебская абласная бібліятэка прызнана лепшай па выніках 2016 года
- Details
- Створана 16.02.2017 05:22
ДУ «Віцебская абласная бібліятэка імя У. І. Леніна» за высокія творчыя дасягненні ў галіне культуры і мастацтва ўзнагароджана дыпломам Віцебскага абласнога выканаўчага камітэта і прызнана лепшай у вобласці.
Адпаведны дыплом уручыў дырэктару бібліятэкі Таццяне Адамян намеснік старшыні аблвыканкама Уладзімір Пенін на выніковым паседжанні калегіі галоўнага ўпраўлення ідэалагічнай работы, культуры і па справах моладзі Віцебскага аблвыканкама, якое адбылося ў г. Гарадку 14 лютага.
У Год культуры абласная бібліятэка арганізавала і правяла больш за 100 цікавых праектаў і мерапрыемстваў, у ліку якіх – бясплатныя курсы па гісторыі Віцебска «Віцебск: рэальная і папулярная гісторыя роднага горада» (сумесна з кафедрай гісторыі Беларусі ВДУ імя П. М. Машэрава, клубам гістарычнай рэканструкцыі «Vargentorn» і Віцебскім гарадскім парталам), выставачныя праекты ў рамках эстэтычнага цыкла «Адлюстраванне» і шматлікія іншыя. На сваім сайце бібліятэка прэзентавала і актывізавала мультымоўную камбінаваную базу даных «Мастакі Віцебшчыны».
Сярод буйных мерапрыемстваў міжнароднага ўзроўня – II Міжнародная навукова-практычная канферэнцыя «Віцебскі край», прысвечаная 385-годдзю Спірыдона Собаля.
Пашыраючы міжнародныя сувязі, Віцебская абласная бібліятэка ў рамках падпісанай у мінулым годзе Дамовы аб супрацоўніцтве з бібліятэкай Смаленскага дзяржаўнага ўніверсітэта пачала стварэнне рэфератыўнай базы даных «Беларускія смаляне, смаленскія беларусы».
Не менш цікавыя і маштабныя праекты бібліятэка плануе рэалізаваць у 2017 годзе, калі будзе адзначацца 500-годдзе беларускага кнігадрукавання.



































