
Круглы стол «Здесь осталась его душа…», прысвечаны 85-годдзю з дня нараджэння Давіда Сімановіча
- Details
- Створана 03.05.2017 06:55
16 мая ў рамках цыкла мерапрыемстваў, прысвечаных 85-годдзю з дня нараджэння Давіда Сімановіча, у бібліятэцы адбыўся круглы стол «Здесь осталась его душа...».
На працягу ўсяго дня, пачынаючы з 10 гадзін раніцы, сябры, калегі, родныя, прадстаўнікі творчай інтэлігенцыі горада, прыхільнікі паэзіі, усе тыя, хто захоўвае памяць пра Давіда Рыгоравіча Сімановіча, гаварылі пра Паэта, Грамадзяніна, Асобу. Сотні фотаздымкаў з асабістага архіва Давіда Сімановіча нагадалі пра старонкі жыццёвага шляху паэта. Кадры кінахронікі вярнулі ўсіх прысутных у той час, калі Давід Сімановіч дапамагаў зноў «вярнуцца» ў Віцебск Пушкіну, Шагалу, Караткевічу...
«Скажите мне сейчас все добрые слова, которые потом произнесёте...», – звяртаўся да ўсіх нас Давід Сімановіч. Гэтых слоў пры жыцці паэта было сказана нямала, яны працягваюць гучаць і зараз. Давід Сімановіч быў сябрам усіх бібліятэк, добрыя словы пра Давіда Рыгоравіча сказалі дырэктар Віцебскай абласной бібліятэкі Таццяна Адамян, дырэктар Цэнтралізаванай бібліятэчнай сістэмы горада Віцебска Галіна Данілава, загадчык бібліятэкі імя У. Караткевіча Галіна Ражноўская. Давід Сімановіч быў сябрам творчай інтэлегенцыі горада. Мастакі Уладзімір Вальноў і Фелікс Гумен, рэжысёр Ігар Баярынцаў у сваіх выступленнях падкрэслілі чалавечую прыязнасць і высокую грамадзянскую мужнасць паэта.
Давід Сімановіч адкрыў шлях у літаратуру многім паэтам і пісьменнікам, заўсёды знаходзіў словы падтрымкі калегам па літаратурнай працы. Пра гэта ўзгадалі пісьменнік Сяргей Рублеўскі, паэткі Алена Крыклівец і Людміла Сіманёнак. Давіда Сімановіча добра ведалі і заўсёды былі рады бачыць у школах. Дырэктар гімназіі № 3 г. Віцебска імя А. С. Пушкіна Людміла Сомава расказала, што за доўгае і плённае супрацоўніцтва гімназія надала паэту Давіду Сімановічу званне «Ганаровы педагог гімназіі». Навучэнцы гімназіі падрыхтавалі цудоўную літаратурна-музычную кампазіцыю. Сяброўствам з паэтам могуць ганарыцца і ўдзельнікі Маладзёжнага тэатра «Колесо» Цэнтра культуры «Віцебск». Кіраўнік калектыву Кірыл Селіванаў расказаў пра сустрэчы з паэтам, а пасля моладзь з захапленнем выканала вершы Давіда Сімановіча.
Першае месца працы Давіда Сімановіча – Крынкаўская сярэдняя школа. Настаўнік беларускай мовы і літаратуры Наталля Сударыкава расказала пра доўгае сяброўства з паэтам, які ў сваіх вершах не забыўся і пра невялічкую станцыю Крынкі.
З імем Давіда Сімановіча звязана станаўленне Віцебскай студыі тэлебачання, дзе ён працаваў доўгія гады. Два відэапрывітанні з успамінамі былых калег прыйшлі з-за мяжы – ад Алы Нікіцінай з Ізраіля і Серафімы Астраўлянскай са Швецыі. Журналіст, пісьменніца Маіна Бабарыка таксама падзялілася сваімі відэаўспамінамі пра сумесную працу з Давідам Сімановічам на тэлебачанні.
Імя Давіда Сімановіча непарыўна звязана з імем Марка Шагала, пра гэта вялі размову ў сваіх выступленнях старшыня Апякунскага савета музея Марка Шагала ў Віцебску Людміла Хмяльніцкая і дырэктар Музея Марка Шагала ў Віцебску Ірына Воранава. Добрыя словы Давіду Сімановічу гучалі і ў выступленні дырэктара Бюро міжнароднага моладзевага турызму «Спутнік» Сяргея Галуза. Пра багаты асабісты архіў паэта, які знаходзіцца ў фондах Дзяржаўнага архіва Віцебскай вобласці, расказала дырэктар архіва Таццяна Свістунова. Цесна супрацоўнічаў Давід Сімановіч з часопісам «Мішпоха», галоўны рэдактар часопіса, журналіст Аркадзь Шульман падзяліўся сваімі ўспамінамі пра паэта.
Давід Сімановіч умеў сябраваць. Пра шчырае шматгадовае сяброўства расказалі блізкія сябры – паэт Уладзімір Папковіч, Святлана Федаровіч (Канапелька), удава паэта Анатоля Канапелькі, фотамастак Міхаіл Шмерлінг і музыкант Вольга Дарэнскіх. Сябар дзяцінства Давіда Сімановіча – доктар псіхалагічных навук, прафесар Якаў Каламінскі не змог прыехаць на імпрэзу, але даслаў свае відэаўспаміны.
Дзённікавыя запісы Давіда Сімановіча чытаў паэт, мастацкі кіраўнік літаратурнага клуба «Літкафейнік» Алег Сяшко. Шчымліва і кранальна прагучаў відэазварот дачкі Давіда Сімановіча Алены да ўсіх удзельнікаў імпрэзы. Гучалі відэазапісы песень на словы Давіда Сімановіча ў выкананні Барыса Насоўскага і Аляксандра Шыпікава. У зале былі прадстаўлены выстава аўтографаў Давіда Сімановіча, кніжная выстава з творамі паэта і прадметы рабочага кабінета, прадастаўленыя Музеем Марка Шагала ў Віцебску.
Працягам святкавання 85-годдзя з дня нараджэння Давіда Сімановіча стане бардаўска-паэтычны вечар «На Пушкинском мосту тебя я жду...», які адбудзецца 26 чэрвеня ў Арт-цэнтры Марка Шагала ў Віцебску.


































