
Старэйшы краязнаўца Віцебска Валянцін Арлоў
- Details
- Створана 16.05.2018 13:04
14 мая ў бібліятэцы ў рамках цыкла «Краязнаўчыя сустрэчы» адбылася сустрэча з Валянцінам Мікалаевічам Арловым, прымеркаваная да 90-гадовага юбілею старэйшага краязнаўцы Віцебска.
Валянцін Арлоў – ураджэнец вёскі Калышкі Лёзненскага раёна, удзельнік руху ў абарону беларускай мовы, доўгі час займаў пасаду старшыні Віцебскай гарадской рады ТБМ, член Беларускага дабраахвотнага таварыства аховы помнікаў гісторыі і культуры. Адзін з актыўных членаў клуба ў абарону помнікаў архітэктуры «Узгор'е». 30 год Валянцін Мікалаевіч працаваў выкладчыкам супрамату, прыкладной механікі, дэталяў машын у Віцебскім тэхналагічным інстытуце лёгкай прамысловасці, метадыстам у аддзеле беларусазнаўства і краязнаўства ў Віцебскім абласным аб'яднанні пазашкольнай працы з дзецьмі і падлеткамі. Аўтар кніг «Каляды ў народнай міфалогіі» і «Купалле – макушка лета».
Сустрэча пачалася яскравым віншаваннем удзельнікаў этнаграфічнай суполкі клуба гістарычнай рэканструкцыі «Vargentorn» Святланы Вакулы і Ганны Разінай, якія выканалі некалькі народных песень. Валянцін Мікалаевіч падзяліўся сваімі развагамі пра стан беларускай мовы, успомніў гады, калі дзякуючы «ўзгорцам» наш горад змог захаваць і аднавіць многія помнікі архітэктуры. Удзельнікі сустрэчы пабачылі відэазапіс работы сяброў клуба «Узгор'е» на Пакроўскай царкве, святкаванне калядаў у беларускім клубе для дзетак «Празоры», фотаздымкі са шматлікіх экскурсій па наваколлях Віцебска, якія Валянцін Арлоў ладзіў для дзяцей.
З 90-годдзем, якое Валянцін Мікалаевіч Арлоў адзначаў у гэты ж дзень, юбіляра павіншаваў і ўручыў Ганаровую грамату старшыня абласной арганізацыі Таварыства беларускай мовы імя Францыска Скарыны Юрый Бабіч. Сябра Саюза беларускіх пісьменнікаў, празаік, эсэіст Франц Сіўко адзначыў актыўную грамадзянскую пазіцыю, чалавечую годнасць і сціпласць Валянціна Мікалаевіча. Словы падзякі прагучалі ад сяброў клуба «Узгор'е» мастацтвазнаўцы Людмілы Вакар і гісторыка мастацтваў Людмілы Хмяльніцкай, загадчыка літаратурнай часткі Беларускага тэатра «Лялька» паэтэсы Людмілы Сіманёнак, сябра ТБМ Алены Чарновай.


































