
«У вайны не жаночы твар»: прэзентацыя поўнага збору твораў Святланы Алексіевіч «Галасы Утопіі»
- Details
- Створана 25.06.2018 14:04
21 чэрвеня ў Віцебскай абласной бібліятэцы быў прэзентаваны перакладзены на беларускую мову цыкл кніг «Галасы Утопіі» лаўрэата Нобелеўскай прэміі па літаратуры Святланы Алексіевіч.
У пачатку 2018 года Святлана Алексіевіч, выдавецтва «Логвінаў» і платформа «Вулей» запусцілі краўдфандынгавую кампанію ў падтрымку выдання 5 кніг з цыклу «Галасы Утопіі» ў перакладах на сучасную беларускую мову. У гэты цыкл уваходзяць пяць кніг, над якімі Святлана Алексіевіч працавала на працягу сарака гадоў: «У вайны не жаночы твар», «Апошнія сведкі», «Цынкавыя хлопчыкі», «Чарнобыльская малітва», «Час сэканд-хэнд». Над перакладамі працавалі: Валянцін Акудовіч, Уладзімір Арлоў, Сяргей Дубавец, Андрэй Хадановіч, Барыс Пятровіч.
У прэзентацыі прынялі ўдзел старшыня Праўлення ААТ «Белгазпрамбанк» Віктар Бабарыка, куратар праекта «Галасы Утопіі» на краўдфандынгавай платформе «Вулей» Аляксандра Зверава, дырэктар выдавецтва «Логвінаў» Ігар Логвінаў, філосаф Валянцін Акудовіч. Віктар Бабарыка перадаў дырэктару Віцебскай абласной бібліятэкі Таццяне Мікалаеўне Адамян сертыфікат на 452 камплекты кніг для бібліятэк Віцебскай вобласці.
Мерапрыемства адбылося напярэдадні трагічнай гістарычнай даты – 77-годдзя пачатку Вялікай Айчыннай вайны і насіла назву «У вайны не жаночы твар». Так назвала адну са сваіх першых кніг Святлана Алексіевіч, узяўшы ў загаловак эпіграф рамана Алеся Адамовіча «Вайна пад стрэхамі»: «У вайны не жаночае аблічча. Але нішто на гэтай вайне не запаміналася больш, мацней, страшней і прыгажэй, чым абліччы нашых маці». Аўтар перакладу кнігі «У вайны не жаночы твар» Валянцін Акудовіч расказаў пра адметнасці выдання і сваю працу над перакладам. Вельмі кранальным было выступленне вучаніцы 10 класа сярэдняй школы № 21 г. Віцебска Паўлавец Марыі, прабабуля якой, Паўлавец Марыя Васільеўна, была адной з гераінь кнігі «У вайны не жаночы твар».
Напрыканцы прэзентацыі ўсе прысутныя атрымалі ў падарунак ад Святланы Алексіевіч па асобніку кнігі з цыкла «Галасы Утопіі» з аўтографам Нобелеўскага лаўрэата.


































