
Творчы вечар Валерыя Марчанкі «Время выбрало нас»
- Details
- Створана 10.10.2019 09:44
8 кастрычніка адбыўся творчы вечар пісьменніка, публіцыста, члена Саюза пісьменнікаў Беларусі, гвардыі падпалкоўніка ў адстаўцы Валерыя Марчанкі «Время выбрало нас».
Валерый Марчанка двойчы – у 1979–1981 і 1987–1989 гадах – прымаў удзел у баявых дзеяннях у Рэспубліцы Афганістан. Узнагароджаны двума ордэнамі Чырвонай Зоркі, ордэнам Чырвонага Сцяга Рэспублікі Афганістан, 26 медалямі.
Валерый Марчанка – член савета Віцебскага абласнога аддзялення Саюза пісьменнікаў Беларусі. Старшыня аддзялення Тамара Краснова-Гусачэнка павіншавала Валерыя Рыгоравіча з 65-годдзем з дня нараджэння і ўручыла Дыплом «За актыўную працу па прапагандзе айчыннай літаратуры, патрыятычным выхаванні моладзі».
Падзеям вайны ў Афганістане Валерый Марчанка прысвяціў свае кнігі «Афган: разведка ВДВ в действии» (2005 г.), «Вектор Афган» (2008 г.), «Афган: там, где небо касается гор» (2011 г.), «Афганский разлом. Истоки мирового терроризма» (2017 г.), «Афган: разведка ВДВ в действии. Мы были первыми» (2018 г.). Падрыхтаваныя да выдання першыя тры тамы мастацка-гістарычнага рамана з 5 тамоў «Калинов мост», які ахоплівае перыяд з сярэдзіны ХІХ стагоддзя да нашых дзён. На творчым вечары Валерый Рыгоравіч не толькі расказаў пра свае кнігі, але і звярнуў увагу прысутных на тыя перадумовы, якія прывялі да Афганскай вайны, на сённяшняе палітычнае становішча ў свеце.
На вечары выступіў старшыня абласнога каардынацыйнага савета грамадскіх аб'яднанняў і палітычных партый, старшыня абласной арганізацыі ветэранаў вайны ў Афганістане Валяр'ян Мацкевіч. Намеснік старшыні абласнога савета ветэранаў Міхаіл Ляшчынскі ўручыў Валерыю Марчанку памятны медаль, прысвечаны 60-годдзю Кургана дружбы, пасведчанне да якога падпісаў губернатар Пскоўскай вобласці Міхаіл Вядзернікаў.
Чырвонай ніткай прайшла праз мерапрыемства тэма 75-годдзя Вялікай Перамогі. Выступіўшая на вечары член абласнога аргкамітэта па ўвекавечанні памяці абаронцаў Айчыны і ахвяр войнаў, кіраўнік Віцебскага рэгіянальнага цэнтра героіка-патрыятычнага выхавання «Пошук» Ларыса Бруева яшчэ раз нагадала ўдзельнікам сустрэчы пра важнасць і неабходнасць работы па пошуку і ўстанаўленні імёнаў воінаў, якія загінулі на нашай зямлі ў гады Вялікай Айчыннай вайны.
Высокую ацэнку творчасці Валерыя Марчанкі дала кандыдат філалагічных навук, паэтэса Алена Крыклівец. Свае вершаваныя радкі прысвяціла ветэранам Афганскай вайны паэтэса, лаўрэат гарадскіх, рэспубліканскіх і міжнародных конкурсаў, фестываляў Ірына Малашэнка. Лірычную нотку ў мерапрыемства ўнеслі паэтэса Ірына Радзіхоўская і спявачка, лаўрэат міжнародных і рэспубліканскіх конкурсаў Валянціна Грачанік.


































