
Фінал конкурсу «Казка – цудоўная краіна» і прэзентацыя альманаха «Ратуша»
- Details
- Створана 18.12.2019 16:16
14 снежня ў бібліятэцы адбыліся два мерапрыемствы Віцебскага аддзялення ГА «Саюз беларускіх пісьменнікаў» з удзелам кіраўніцтва творчай арганізацыі.
Віцебская абласная бібліятэка стала пляцоўкай для правядзення фіналу конкурсу «Казка – цудоўная краіна» сярод школьнікаў вобласці ва ўзросце ад 7 да 14 гадоў. Галоўны ініцыятар і каардынатар – старшыня віцебскай пісьменніцкай арганізацыі Анастасія Лазебная. Конкурс праведзены сумесна з Беларускім тэатрам «Лялька» і гарадскімі курсамі «Мова нанова». Многія ўдзельнікі конкурсу былі адзначаны дыпломамі і прызамі. Узнагароджвалі пераможцаў ганаровыя госці імпрэзы і партнёры па правядзенні конкурсу – мастацкі кіраўнік тэатра «Лялька» Віктар Клімчук, старшыня Саюза беларускіх пісьменнікаў Барыс Пятровіч і намеснік старшыні Усевалад Сцебурака, пісьменнік Франц Сіўко, кіраўнік моўных курсаў Таццяна Дубоўская. Імпрэзу вялі Анастасія Лазебная і паэтэса Людміла Сіманёнак.
Затым у актавай зале бібліятэкі прайшла прэзентацыя пятага выпуску літаратурна-мастацкага альманаха «Ратуша», выдадзенага Віцебскім абласным аддзяленнем Саюза беларускіх пісьменнікаў. У ім змешчаны лепшыя творы пісьменнікаў Віцебшчыны.
Словамі віншавання адкрыў сустрэчу старшыня ГА «Саюз беларускіх пісьменнікаў» Барыс Пятровіч (Сачанка). Ён уручыў пасведчанне сябра арганізацыі пісьменніку, загадчыку літаратурна-драматычнай часткі Нацыянальнага акадэмічнага драматычнага тэатра імя Я. Коласа Алесю Замкоўскаму. Укладальнік альманаха Анастасія Лазебная расказала аб рабоце над юбілейным выпускам альманаха і прадставіла яго аўтараў.
Свае творы падчас сустрэчы прачыталі як сталыя майстры слова, так і тыя, чые творы ўпершыню ўвайшлі ў новы выпуск альманаха. Сярод іх паэты Людміла Сіманёнак, Наталля Салаўёва, Алесь Замкоўскі, Аляксандр Пішчык, Вячаслаў Шайнураў, Дар'я Дабрынеўская, перакладчык Віялета Зенчанка, паэт і бард Георгій Станкевіч. Кастусь Севярынец прысвяціў сваё выступленне паэтэсам Яўгеніі Мальчэўскай і Ганне Рамнёвай, якіх ужо няма з намі, але іх творы надрукаваны ў альманаху. Завяршылася вечарына выступленнем паэта-сатырыка Міхася Мірановіча.


































