
Віцебск дэсантны
- Details
- Створана 28.02.2020 11:15
Бясплатныя курсы «Віцебск: рэальная і папулярная гісторыя роднага горада»
27 лютага ў Віцебскай абласной бібліятэцы адбыліся заняткі бясплатных курсаў «Віцебск: рэальная і папулярная гісторыя роднага горада» на тэму «Віцебск дэсантны».
Сваё 75-годдзе ў студзені 2020 года адзначыла 103-я Віцебская асобная гвардзейская паветрана-дэсантная ордэна Леніна, Чырванасцяжная, ордэна Кутузава ІІ ступені брыгада імя 60-годдзя СССР. 1 студзеня 1945 года была сфарміравана 103-я гвардзейская стралковая дывізія, якая дыслацыравалася ў Віцебскай вобласці з 1946 года.
Пра слаўную гісторыю свайго вайсковага фармiравання слухачам курсаў расказаў старшы афіцэр аддзялення ідэалагічнай работы 103-й асобнай гвардзейскай мабільнай брыгады Аляксандр Пастарнак. Аляксандр Іванавіч нагадаў прысутным гісторыю стварэння паветрана-дэсантных войск, ролю генерала Васіля Маргелава ў фарміраванні паветрана-дэсантных войск, пра буйныя вайсковыя аперацыі і вучэнні, у якіх прымала ўдзел дывізія, аб удзеле дывізіі ў Афганскай вайне.
103-я брыгада адзіная з беларускіх злучэнняў уваходзіць у поўным складзе ў сілы рэагавання АДКБ. Таксама ў ёй ёсць адзіная ў краіне міратворчая рота. Слухачы курсаў паглядзелі фільм пра брыгаду «Героями не рождаются».
Пра гісторыю стварэння помніка дэсантнікам у Віцебску, ролю ўраджэнца Віцебска, аўтара падручнікаў для дэсантнікаў, намесніка камандуючага ПДВ СССР Івана Лісава ва ўвядзенні блакітнага берэта і цяльняшкі таго ж колеру ў якасці ўніформы дэсантнікаў расказаў кандыдат гістарычных навук, галоўны спецыяліст упраўлення культуры Віцебскага аблвыканкама Дзяніс Юрчак.
Відэаверсіі папярэдніх лекцый і перадач размешчаны на сайце абласной бібліятэкі, а таксама ў групе курсаў у сацыяльнай сетцы.


































