
Кніжная выстава «Альтэрнатыўнае падарожжа па землях Германіі»
- Details
- Створана 22.04.2020 15:14
Кнігі і інтэрнэт маюць шмат пераваг, сярод якіх – магчымасць падарожнічаць без межаў, часовых рамак і знешніх абставінаў. Нямецкая чытальная зала запрашае ўсіх жадаючых здзейсніць падарожжа па федэральных землях Германіі і азнаёміцца з кніжнай выставай, прадстаўленай у зале.
Як вядома, Германія ўяўляе сабой федэратыўную рэспубліку, якая складаецца з федэральных зямель. У суме ўсе землі складаюць плошчу 357 021 км². Такім чынам, Германія з'яўляецца адной з самых вялікіх краін Еўропы па плошчы, а таксама лідзіруе сярод краін Еўропы па колькасці насельніцтва.
Германія налічвае 16 федэральных зямель. У іх лік уваходзяць таксама тры гарады: Берлін, Брэмен і Гамбург, якія валодаюць статусам зямлі. Кожная з зямель мае свой характар і ўнікальную гісторыю, бо да сярэдзіны XIX стагоддзя на тэрыторыі сучаснай Германіі існавала мноства дробных дзяржаў, якія пастаянна мянялі свае межы. Нават дыялекты, на якіх кажуць людзі ў розных частках Германіі, моцна адрозніваюцца адзін ад аднаго, паколькі суседнія краіны (Францыя, Польшча, Чэхія, Данія і іншыя) у свой час моцна ўплывалі на прыгранічныя нямецкія тэрыторыі.
Федэральныя землі – гэта 16 маленькіх «дзяржаў» са сваёй культурай, традыцыямі, прыродай. Яны аб'яднаны ў адзін саюз, але зусім не аднастайныя. У кожнай зямлі ёсць свая сталіца (акрамя зямель-гарадоў). Кожная федэратыўная адзінка мае свабоду ў прыняцці мясцовых законаў. Пры гэтым самыя важныя стратэгічныя пытанні застаюцца ў падпарадкаванні федэральнага праўлення. Кожная зямля мае свае адметнасці і асаблівасці, таму заслугоўвае асобнай увагі. Усе жадаючыя могуць азнаёміцца з краіназнаўчай літаратурай па гэтай тэме ў нямецкай чытальнай зале.


































