
Паказ польскіх спектакляў і анімацыйных фільмаў у тэатры “Лялька”
- Details
- Створана 22.06.2012 13:10
2 і 3 ліпеня ў Віцебску ў тэатры “Лялька” ў межах Міжнароднага фестывалю тэатра лялек і анімацыйных фільмаў для дарослых “Лялька таксама чалавек” чакаецца паказ польскіх спектакляў і анімацыйных фільмаў.
Гэты фестываль штогадова праводзіцца ў розных гарадах свету, пачынаючы з 2006 года. Ініцыятарам праекта выступае акцёрская асацыяцыя “Саюз Тэатр Немагчымы”, якая ўжо на працягу 15 гадоў прапагандуе ў розных краінах свету тэатр лялек для дарослых. Мэта фестывалю – паказаць, што анімацыя і тэатр лялек з’яўляюцца паўнапраўнай мовай тэатральнага і кінамастацтва, накіраванай не толькі на дзіцячую аўдыторыю. Спектаклі “Саюза Тэатр Немагчымы” неаднаразова адзначаліся прэстыжнымі ўзнагародамі міжнароднага ўзроўню.
У гэтым годзе магчымасць пабачыць гэтыя спектаклі атрымаюць і жыхары Віцебска. Яны змогуць наведаць пастаноўкі “Саюза Тэатр Немагчымы” “Другі пакой” (імпрэсія паводле Збігнева Герберта, на беларускай мове) і “Тапорлянд” (сцэнічны жарт паводле апавяданняў Раланда Тапора, сюіта без слоў), а таксама анімацыйныя фільмы вядомых студый “Се-ма-фор” і “Серафіньскі”.


































