
Горад, які чытае
- Details
- Створана 21.07.2020 10:14
У рамках XXIX Міжнароднага фестывалю мастацтваў «Славянскі базар у Віцебску» ў бібліятэцы прайшлі мерапрыемствы бібліятэчнай пляцоўкі «Горад, які чытае».
З 17 па 19 ліпеня сквер перад бібліятэкай стаў адкрытай інтэрактыўнай пляцоўкай для мноства літаратурна-музычных, гісторыка-патрыятычных і гульнявых праграм.
Святочныя мерапрыемствы адкрыла сацыякультурная праграма «В памяти. В сердце. В книгах», прысвечаная 75-годдзю Перамогі ў Вялікай Айчыннай вайне.
Госці мерапрыемства далучыліся да патрыятычнай акцыі «Пока живем, помним» і разам сабралі палатно памяці, напісаўшы на ім свае пажаданні франтавікам, распавялі пра сваіх родных, якія ваявалі на фронце або працавалі ў тыле – тых, хто загінуў у баях ці прайшоў праз усё і выжыў.
Наведвальнікі інтэрактыўнай бібліятэчнай пляцоўкі мелі ўнікальную магчымасць пазнаёміцца з фотапраектам «Живая память», створаным па ініцыятыве супрацоўнікаў Віцебскага раённага гісторыка-краязнаўчага музея. Хлопцам і дзяўчатам з Кастрычніцкай сярэдняй школы Віцебскага раёна прапанавалі ўзнавіць сюжэты ваенных фотаздымкаў з фондаў музея.
Школьнікі – у салдацкай форме, з медалямі на грудзях – сталі галоўнымі героямі новых здымкаў. За кожнай фатаграфіяй – карпатлівая праца ўдзельнікаў праекта. А за кожным поглядам з мінулага – свая гісторыя.
У музычнай праграме «Мелодии военных лет» песні Вялікай Айчыннай прагучалі ў выкананні вучняў дзіцячай школы мастацтваў № 5 горада Віцебска Ірыны Дубко, Аляксандры Гардзецкай, Ульяны Анікійчук, Аляксандры Жыльцовай.
Вайна становіцца гісторыяй, але яна не сыходзіць з нашых сэрцаў. І ў мірнае неба над Віцебскам узляцелі паветраныя шары ў імя ўсіх тых, хто жывы, і тых, каго ўжо няма, і тых, хто будзе потым.
Віцябляне і госці горада таксама маглі прыняць удзел у акцыі «Открытый микрофон "Читаем строки о войне"»: успомніць тых, хто ваяваў і перамог у Вялікай Айчыннай.
На прэзентацыі выставы кніжных выданняў з фондаў Віцебскай абласной бібліятэкі «Свет Великой Победы» было прадстаўлена больш за 100 кніг, якія распавядаюць пра гераізм, мужнасць і стойкасць савецкіх людзей у гады Вялікай Айчыннай вайны.
У рамках інтэрактыўнай бібліятэчнай пляцоўкі «Земля, что дарит вдохновенье» прайшла прэзентацыя выставы «Літаратурная Віцебшчына», прысвечаная творчасці пісьменнікаў і паэтаў нашага краю. Асаблівае месца на ёй займалі кнігі пісьменнікаў-лаўрэатаў Віцебскай абласной «Літаратурнай прэміі імя Петруся Броўкі».
Сустрэча з паэзіяй – гэта заўсёды свята. А калі паэты, аўтары выдатных радкоў пра твой горад, пра малую радзіму, знаходзяцца побач і самі чытаюць свае творы – гэта па-сапраўднаму яркая, запамінальнае падзея.
На літаратурнай пляцоўцы Open air «Паэтычны Віцебск» наведвальнікі мелі магчымасць паслухаць выступ паэтэсы, старшыні Віцебскага абласнога аддзялення Саюза пісьменнікаў Беларусі, лаўрэата Першай Нацыянальнай літаратурнай прэміі ў галіне паэзіі, шматлікіх міжнародных літаратурных прэмій Тамары Красновай-Гусачэнкі і прыняць удзел у паэтычных чытаннях з удзелам паэтаў Алены Крыклівец, Алега Сяшко, Алены Фядзяевай, Ірыны Радзіхоўскай, Святланы Якубоўскай, Андрэя Шуханкова, Валянціны Шырынавай, Дзмітрыя Юртаева, Яны Явіч, Васіля Калтунова, Вольгі Мацкевіч, Анастасіі Кузьмічовай, Лідзіі Шышко.
Госці маглі таксама прыняць удзел у культурнай акцыі «Стихи в кармане», дзе кожны жадаючы мог прачытаць верш услых, ці проста забраць яго з сабой, каб атрымаць асалоду ад чытання паэтычных радкоў у вольны час.
Юныя ўдзельнікі свята і іх бацькі прынялі ўдзел у літаратурна-гульнявой праграме «Праздник детства, сказки волшебство», творчай лабараторыі «Мастерская радости», кніжным лабірынце «Чудо-книжки – чудо-детям», гульнятэцы «Я играю, я читаю, я творю», выставе дзіцячага малюнка «Детство. Творчество. Фантазия».
Завяршыліся мерапрыемствы бібліятэчнай пляцоўкі правядзеннем сацыякультурнай праграмы «Роднай зямлі шматгалоссе», падчас якой прайшла прэзентацыя кнігі Мікалая Півавара «Сядзібы Віцебшчыны», што выйшла ў выдавецтве «Беларуская энцыклапедыя» у бягучым годзе. Аўтар кнігі распавёў аб працы над даведнікам, якая стала вынікам некалькіх гадоў даследаванняў у архівах. Выданне змяшчае інфармацыю пра гісторыю амаль 300 сядзіб Віцебскай вобласці, іх былых уладальніках, архітэктуры, а таксама аб сучасным стане і тэндэнцыях іх развіцця.
Падчас паэтычнага марафону «Мой отчий край ни в чем не повторим» прайшла сустрэча з паэтэсай, аўтарам і выканаўцам Ганнай Чумаковай, а таксама пісьменнікамі – сябрамі літаратурнага аб'яднання «Полоцкая ветвь».
Госці свята таксама маглі прыняць удзел у патрыятычнай акцыі «Наш край, пачуй прызнанне ў любві!», краязнаўчым калейдаскопе «Віцебск фестывальны», бліц-турніры «Ці ведаеш ты свой горад?», пазнаёміцца з кніжнымі выставамі «Листая новых книг страницы», «Табе, мой край!..», «Все цветы июля».
Для дзяцей была арганізавана інтэрактыўная пляцоўка «Солнце на книжных ладошках», дзе нашы маленькія наведвальнікі і іх бацькі змаглі стаць удзельнікамі літаратурна-гульнявой праграмы «Праздник детства, сказки волшебство», творчай лабараторыі «Мастерская радости», гульнятэкі «Я играю, я читаю, я творю». На пляцоўцы працавалі кніжная выстаўка «Чудо-книжки – чудо-детям», выстава дзіцячага малюнка «Табе, мой горад, прысвячаю...».
Глядзець на Youtube.


































