
Прэзентацыя кнігі Сяргея Тамбі «Эстонцы в Беларуси»
- Details
- Створана 17.08.2021 16:09
24 жніўня ў бібліятэцы адбылася прэзентацыя кнігі даследчыка эстонскіх абшчын Сяргея Тамбі (г. Санкт-Пецярбург) «Эстонцы в Беларуси», у якой разглядаюцца гісторыя фарміравання і этнакультурныя асаблівасці эстонскага насельніцтва Беларусі.
Сяргей Тамбі – аўтар больш за 100 навуковых і публіцыстычных артыкулаў па гісторыі і этнаграфіі. Тэма, якую малады навуковец узяў для свайго даследавання, мала вывучана. Упершыню ў гістарыяграфіі ў працы комплексна асвятляюцца розныя аспекты жыццядзейнасці перасяленцаў з Ліфляндскай і Эстляндскай губерній Расійскай імперыі і іх нашчадкаў у перыяд з XIX стагоддзя да 2020 года. У Віцебскай губерні па дадзеным Першага агульнага перапісу насельніцтва Расійскай імперыі 1897 года пражывала 907 эстонцаў, у Аршанскім павеце Магілёўскай губерні – 634 эстонцы. Самая вялікая эстонская абшчына Беларусі знаходзілася ў в. Горбава Лёзненскага раёна.
Сімвалічна, што першая прэзентацыя кнігі Сяргея Тамбі адбылася ў Віцебску, бо менавіта тут калісьці сустрэліся і пазнаёміліся яго прадзядуля і прабабуля. Падчас прэзентацыі кнігі Сяргей падрабязна спыніўся на розных акалічнасцях жыцця эстонскіх перасяленцаў, расказаў пра дакументальныя крыніцы, якімі карыстаўся пры напісанні кнігі, знаёмства з нашчадкамі перасяленцаў.
Нашу краіну насяляе вялікая колькасць народаў, іх традыцыі і самабытная культура перапляліся з традыцыямі беларускага народа. На вокладцы кнігі намаляваны васілёк, адзін з пялёсткаў якога працягваецца эстонскім арнаментам. Васілёк – нацыянальная кветка Эстоніі і неафіцыйны сімвал Беларусі. Кніга «Эстонцы в Беларуси», якую аўтар падарыў Віцебскай абласной бібліятэцы, будзе цікавая не толькі этнографам і гісторыкам, але і шырокаму колу чытачоў.


































