
15 верасня – Дзень бібліятэк Беларусі
- Details
- Створана 16.09.2021 11:18
15 верасня ў бібліятэцы прайшлі сацыякультурныя мерапрыемствы, прымеркаваныя да Дня бібліятэк Беларусі і Дня народнага адзінства.
Супрацоўнікі бібліятэкі падрыхтавалі для чытачоў святочную праграму «З любоўю да кнігі. З любоўю да Беларусі», у рамках якой адбыліся творчыя сустрэчы з пісьменнікамі, прэзентацыі кніг і бібліятэчных выстаў, інтэрактыўныя гульні для дзяцей, інтэлектуальныя конкурсы, квэсты, майстар-класы. Галоўнай падзеяй свята стала прэзентацыя абноўленага аддзела абанемента.
На ўрачыстым адкрыцці святочнай праграмы прысутнічалі старшыня Віцебскага абласнога выканаўчага камітэта Мікалай Шарснёў, начальнік упраўлення культуры Віцебскага абласнога выканаўчага камітэта Пётр Падгурскі, старшыня Віцебскага гарадскога Савета дэпутатаў Уладзімір Бялевіч. У сваім выступленні Мікалай Шарснёў адзначыў сацыяльную значнасць бібліятэк і іх важную ролю не толькі ў папулярызацыі чытання і кнігі, але і ў выхаванні падрастаючага пакалення. Прагучалі віншаванні з Днём бібліятэк ад дырэктара бібліятэкі Таццяны Адамян, старшыні Віцебскага абласнога аддзялення Саюза пісьменнікаў Беларусі Тамары Красновай-Гусачэнкі, чытачоў і партнёраў бібліятэкі.
На працягу дня ў бібліятэцы працавала выстава-панарама новых паступленняў «Новае імя ў літаратуры», выстава рэдкіх выданняў «Скарбы нашай бібліятэкі», інтэрактыўная інфармацыйная пляцоўка «Экарацыянальнасць», традыцыйная акцыя «Кніга з рук у рукі». Чытачы з цікавасцю ўдзельнічалі ў літаратурна-дэтэктыўным квэсце «Па слядах Шэрлака Холмса», літкруізе «Беларуская легенда па-англійску», інтэрактыўных віктарынах «Край мой – Беларусь», «Віцебшчына фестывальная», «У назвах вуліц памяць жыве», «гасцявалі» на бібліятэчным падворку «Кніжны Big-Ben». Для аматараў паэтычнай творчасці была прадстаўлена інтэрактыўная выстава «Вазьмі паэзію з сабой».
Сумесна з псіхолагам Наталляй Ісакавай супрацоўнікі агульнай чытальнай залы правялі мерапрыемства ў стылі хуткіх кніжных спатканняў «Ты, я і кніга» – юнакі і дзяўчаты дзяліліся ўражаннямі аб сваіх любімых кнігах, высвятлялі ўзаемныя літаратурныя прыхільнасці і знаёміліся адзін з адным.
У святочны дзень у бібліятэцы адбылася прэзентацыя АРТ-студыі па дэкаратыўна-прыкладной творчасці для дарослых «Майстра», прайшлі майстар-класы для дзяцей і дарослых па вырабе беларускай лялькі-абярэга «Дакрануцца ды гісторыі» і беларускага сувеніра-брошкі «Васілёк», «Кніжная закладка».
У аддзеле перыядычных выданняў адбылося ўзнагароджанне пераможцаў online-конкурсу кніжных кампазіцый «BookBento», удзельнікі атрымалі дыпломы і прызы ад кампаніі OZ, а падчас відэапрэзентацыі «Чытаем разам» чытачы дзяліліся сваім меркаваннем пра кнігі, бібліятэку і ролю чытання ў іх жыцці.
У творчай атмасферы прайшла сустрэча з пісьменнікам, лаўрэатам Першай Нацыянальнай літаратурнай прэміі Тамарай Красновай-Гусачэнка.
Адбылася сустрэча з паэтам, членам Саюза пісьменнікаў Беларусі, кіраўніком тэатра «ЛітаСфера» Анастасіяй Кузьмічовай (г. Мінск).
Прайшла прэзентацыя зборніка матэрыялаў VI Міжнароднай навукова-практычнай канферэнцыі «Віцебскі край».
Юных чытачоў бібліятэкі супрацоўнікі аддзела дзіцячай літаратуры сустракалі на бібліятэчнай пляцоўцы «Веселое приклюЧТЕНИЕ». Дзеці наведалі Школу юнага бібліятэкара «Бібліятэкар на гадзіну» – абслугоўвалі чытачоў, працавалі з фондам, афармлялі бібліятэчную выставу – і з задавальненнем удзельнічалі ў бібліятэчнай акцыі «Звездопад пожеланий» і смайл-апытанні «Мая бібліятэка».


































