
Каталог выставы “Генадзь Лебедзеў. Зачараваны даўніной”
- Details
- Створана 03.04.2012 08:44
Аддзел літаратуры па мастацтве сумесна з Віцебскім абласным краязнаўчым музеем, музеем "Віцебскі цэнтр сучаснага мастацтва", а таксама віцебскім аддзяленнем Беларускага саюза мастакоў рэалізаваў праект, прысвечаны творчасці беларускага мастацтвазнаўца, мастака і краязнаўца Генадзя Пятровіча Лебедзева. Вынікам супрацоўніцтва стаў каталог выставы "Генадзь Лебедзеў. Зачараваны даўніной", якая экспанавалася ў кастрычніку 2011 года ў Мастацкім музеі г. Віцебска і была прысвечана памяці мастака.
Складальнікамі каталога выступілі кандыдат мастацтвазнаўства, дацэнт кафедры выяўленчага мастацтва мастацка-графічнага факультэта Віцебскага дзяржаўнага ўніверсітэта імя П. М. Машэрава М. Цыбульскі, магістр мастацтвазнаўства, навуковы супрацоўнік Мастацкага музея А. Крывенькая.
Усяго ў каталог уключана 58 работ Г. Лебедзева, якія выкананы ў розных тэхніках. Сярод іх маляўнічыя кампазіцыі ў серыі "Гісторыя Віцебска", "Дача І. Рэпіна ў Зраўнёва", "Свята-Георгіеўскі манастыр у полі пад Полацкам XII–XVI ст.", графічныя замалёўкі, якія адлюстроўваюць гісторыка-архітэктурную спадчыну роднага горада: "Цэнтр Віцебска ў канцы XX ст. Панарама Рынкавай плошчы з Ратушай, касцёлам св. Антонія і Уваскарсенскай царквой", "Будынак былых Першага віцебскага Вышэйшага Народнага мастацкага вучылішча, потым – Мастацка-практычнага інстытута" і інш.
Выданне таксама ўключае пералік дат, якія характарызуюць асноўныя вехі жыццёвага і творчага шляху мастака, бібліяграфічны спіс артыкулаў, навуковых даследаванняў Г. Лебедзева, матэрыялы пра яго дзейнасць.


































