
Літаратурна-гістарычная кампазіцыя «Як усё пачыналася»
- Details
- Створана 26.12.2022 14:35
23 снежня ў бібліятэцы адбылася літаратурна-гістарычная кампазіцыя «Як усё пачыналася», прысвечаная дню ўводу савецкіх войск у Рэспубліку Афганістан 25 снежня 1979 года.
Вядучыя мерапрыемства, загадчык аддзела краязнаўства Ларыса Рагачова і воін-інтэрнацыяналіст, гвардыі маёр медыцынскай службы запасу Аляксандр Халатран, нагадалі прысутным пра падзеі, якія папярэднічалі ўводу савецкіх войск, колькасць удзельнікаў ваенных дзеянняў – ваеннаслужачых Савецкай Арміі, зачыталі ўспаміны камандзіраў і радавых. Старшыня абласной арганізацыі грамадскага аб'яднання «Беларускі саюз ветэранаў вайны ў Афганістане» Валяр'ян Мацкевіч падкрэсліў, што мерапрыемства праводзіцца як даніна памяці ўсім, хто мае дачыненне да гераічнай і трагічнай афганскай вайны.
У зале прысутнічалі воіны-інтэрнацыяналісты, ветэраны 103 гвардзейскай паветрана-дэсантнай дывізіі, якія першымі ўваходзілі ў Афганістан, удовы загінуўшых воінаў, навучэнцы Віцебскага дзяржаўнага каледжа электратэхнікі, сярэдняй школы № 4 г. Віцебска. Пра падзеі першых дзён вайны, першых баявых аперацыях расказалі падпалкоўнік у адстаўцы Цімафей Харошанькі, падпалкоўнік у адстаўцы Іван Бурлака, маёр у адстаўцы Аляксандр Масціброцкі. Пра дзейнасць авіятараў 339 ваенна-транспартнага авіяцыйнага палка ўзгадаў камандзір эскадрыллі, падпалкоўнік у адстаўцы Аляксандр Ручац. Навучэнец сярэдняй школы № 4 г. Віцебска Яўген Бутманаў выступіў з дакладам «Мы ў памяці захоўваем Афганістан», прысвечаным выпускніку школы, воіну-інтэрнацыяналісту Сяргею Кароткіну, які загінуў у Афганістане, а таксама праектам па захаванні памяці ўдзельнікаў афганскай вайны, якая рэалізуюцца ў школе.
Нікога не пакінулі абыякавымі кранаючыя душу радкі песень у выкананні Пятра Захарава, Юрыя Паўлюка, Валянціны Грачанік, Елізаветы Новікавай.


































