
Вечар-рэквіем «Беларусь памятае. Галасы спаленых вёсак» да 80-годдзя трагедыі ў Хатыні
- Details
- Створана 22.03.2023 07:38
20 сакавіка ў бібліятэцы адбыўся вечар-рэквіем да 80-годдзя трагедыі ў Хатыні «Беларусь памятае. Галасы спаленых вёсак».
Невялікая беларуская вёска стала сімвалам усіх спаленых населеных пунктаў Савецкага Саюза. Яна была знішчана фашысцкімі карнікамі і іх памагатымі 22 сакавіка 1943 года. Той дзень стаў апошнім для 149 чалавек. У 1969 годзе ў Хатыні адкрылі мемарыяльны комплекс. Да 80-годдзя Хатынскай трагедыі ў мемарыяльным комплексе была разгорнута маштабная рэканструкцыя. Аб'екту быў нададзены статус Усебеларускай маладзёжнай будоўлі. У аднаўленні мемарыяла «Хатынь» прынялі ўдзел студэнцкія атрады з усёй краіны. На мерапрыемстве сваімі ўспамінамі падзяліўся баец студэнцкага атрада Віцебскага дзяржаўнага ўніверсітэта імя П. М. Машэрава Уладзіслаў Лепясевіч.
Пра давядзенне да шырокай аўдыторыі невядомых старонак Вялікай Айчыннай вайны, работу па стварэнні рэсурсаў, прысвечаных трагічным старонкам вайны, расказалі дырэктар Віцебскага абласнога музея Героя Савецкага Саюза М. П. Шмырова Ірына Шышкова, дырэктар Віцебскага раённага гісторыка-краязнаўчага музея Андрэй Кулябкін, галоўны захавальнік фондаў Дзяржаўнага архіва Віцебскай вобласці Канстанцін Карпекін.
Адзін з пераможцаў гарадскога конкурсу літаратурна-музычных кампазіцый патрыятычнай тэматыкі, узорны тэатральны калектыў «ТэСТ» сярэдняй школы № 4 г. Віцебска, пазнаёміў прысутных з мастацка-літаратурнай кампазіцыяй «Хатынь».
Трагічныя выпрабаванні, якія выпалі на долю беларускага народа, ніколі не знікнуць з памяці. Гэтую памяць трэба захоўваць і перадаваць наступным пакаленням, каб Хатынская трагедыя не паўтарылася. Гэтая думка стала лейтматывам усяго мерапрыемства. Пра гэта 23 сакавіка 2023 года будуць звінець «хатынскія званы».


































