
Вечар-успамін «Летапісцы гераічнага мінулага»
- Details
- Створана 23.05.2023 08:13
18 мая ў бібліятэцы адбыўся вечар-успамін «Летапісцы гераічнага мінулага», прысвечаны 100-годдзю з дня нараджэння Ніны і Мікалая Дарафеенкаў.
Ніна Дарафеенка (Маісеева) – удзельніца падпольнага і партызанскага руху ў гады Вялікай Айчыннай вайны, кандыдат гістарычных навук, заслужаны работнік вышэйшай школы БССР. Мікалай Дарафеенка – удзельнік Вялікай Айчыннай вайны, лётчык-знішчальнік, журналіст, заслужаны работнік культуры БССР. У 1970–1983 гады ён з'яўляўся галоўным рэдактарам газеты «Віцебскі рабочы», пазней – старшынёй абласной журналісцкай арганізацыі. Дзякуючы намаганням Ніны Іванаўны і Мікалая Уладзіміравіча, іх пошукам, збору матэрыялаў былі ўстаноўлены і ўпершыню названы імёны тысяч герояў віцебскага партыйна-камсамольскага падполля. Іх кніга «Витебское подполье» (1969, 1974) – дакументальны аповед пра жывых і загінуўшых герояў віцебскага падполля ў гады Вялікай Айчыннай вайны. Яна да сённяшняга часу засталася актуальнай і найбольш поўнай крыніцай звестак пра змагароў-патрыётаў. Ніна Дарафеенка таксама з'яўляецца адным з аўтарам кнігі «Юные герои Витебщины» (1980). Артыкулы Ніны і Мікалая Дарафеенкаў па гісторыі Віцебска размешчаны ў многіх энцыклапедычных і даведачных выданнях.
Загадчык аддзела краязнаўства Ларыса Рагачова расказала пра асноўныя вехі жыцця і дзейнасці Ніны і Мікалая Дарафеенкаў. Сваімі ўспамінамі аб працы, сустрэчах, сяброўстве з Нінай Іванаўнай і Мікалаем Уладзіміравічам падзяліліся галоўны спецыяліст галоўнага ўпраўлення ідэалагічнай работы і па справах моладзі Віцебскага аблвыканкама Святлана Дзядзінкіна, работнік культуры Вольга Акуневіч, загадчык кафедры гісторыі і культурнай спадчыны Віцебскага дзяржаўнага ўніверсітэта імя П. М. Машэрава Анатоль Дулаў, тэлежурналіст Валерый Зяльвінскі, галоўны рэдактар альманаха «Мишпоха» Аркадзь Шульман, ветэран Іосіф Навумчык, краязнаўца Аркадзь Падліпскі, мастацтвазнаўца Аляксандр Лісаў.
Старэйшая дачка Ніны і Мікалая Дарафеенкаў Валянціна Кучарэнка перадала ў дар Віцебскай абласной бібліятэцы кнігі з аўтографамі аўтараў, падораныя яе бацькам.


































