
Семінар-практыкум «Сучасная бібліятэка: стратэгія працы ў сацыяльных медыя»
- Details
- Створана 27.04.2023 09:58
Віцебская абласная бібліятэка імя У. І. Леніна правяла навучальны семінар-практыкум «Сучасная бібліятэка: стратэгія работы ў сацыяльных медыя» для прадстаўнікоў бібліятэчных сістэм Віцебскай вобласці.
Спецыялісты аддзелаў маркетынгу і сацыякультурнай дзейнасці ўсяго рэгіёна 21 красавіка 2023 года ў фармаце круглага стала дзяліліся асноўнымі цяжкасцямі і значнымі дасягненнямі ў сваёй дзейнасці.
Намеснік дырэктара Віцебскай абласной бібліятэкі імя У. І. Леніна Вольга Камендантава прывітала ўдзельнікаў, адзначыла эфектыўнасць абмену вопытам і значнасць прафесійнай узаемападтрымкі.
З удзелам Вольгі Марчанкі, начальніка аддзела інфармацыйна-аналітычнай і рэпертуарна-выдавецкай дзейнасці ДУ «Віцебскі абласны метадычны цэнтр народнай творчасці», прааналізаваны сучасны стан і праблемы вядзення Інтэграванай базы дадзеных, а таксама вызначаны задачы па ўдасканаленню работы для збору, захоўвання, апрацоўкі дадзеных пра становішча і дзейнасць публічных бібліятэк.
Асноўная ўвага на семінары была нададзена якасці кантэнту афіцыйных сайтаў бібліятэк вобласці і акаўнтаў у сацыяльных сетках. Аддзел бібліятэказнаўства Віцебскай абласной бібліятэкі ажыццяўляе пастаянны маніторынг гэтых рэсурсаў, які выяўляе недастатковасць вопыту работы ў новым камунікацыйным асяроддзі. У 2023 годзе адбыліся 2 рабочыя сустрэчы з аналізам актуальнага становішча і рэкамендацыямі па ўдасканаленні работы. Своечасовае выпраўленне недахопаў, прымяненне крэатыўных рашэнняў і эфектыўнае выкарыстанне прафесійнага патэнцыялу супрацоўнікаў бібліятэк дае пазітыўныя вынікі дзейнасці ў анлайн-асяроддзі.
Прыкладамі паспяховай работы з мэтавымі аўдыторыямі на аснове пастаяннага аналізу запытаў чытачоў падзяліліся прадстаўнікі бібліятэчных сістэм Віцебска і Наваполацка.
Сацыяльныя медыя як камунікацыйнае асяроддзе актыўна запатрабаваныя ў розных дзіцячых бібліятэках вобласці. Анастасія Крупко, загадчык аддзела абслугоўвання дзіцячай бібліятэкі-філіяла № 3 імя С. Маршака ДУК «Цэнтралізаваная бібліятэчная сістэма г. Наваполацка», прадставіла калегам прэзентацыю з агульнымі падыходамі і наборам тэхналогій, якія дазваляюць прасоўваць бібліятэчныя паслугі, анансаваць падзеі і паступленні навінак літаратуры, размаўляць паміж сабой і дзяліцца меркаваннямі.
Прынцып «Ствараем кантэнт для бібліятэчнай групы ў сацсетках: асветніцкі, інфармуючы і забаўляльны» ляжыць у аснове працы Цэнтральнай гарадской бібліятэкі імя М. Горкага. Загадчык аддзела маркетынгу і сацыякультурнай дзейнасці Ірына Хомчанка падзялілася дэталямі фарміравання кантэнт-плана, стварэння і напаўнення рубрык, сістэмы хэштэгаў і іншымі прафесійнымі прыёмамі.
Працягвалася работа ў Медыяцэнтры Віцебскай вобласці. Намеснік галоўнага рэдактара абласной газеты «Віцебскія весці» Юлія Новікава ў прывітальным слове коратка пазнаёміла ўдзельнікаў семінара з гісторыяй Дома прэсы, мэтамі стварэння Медыяцэнтра Віцебскай вобласці і сардэчна запрасіла да супрацоўніцтва.
Пра асновы фотаздымкі, прыёмы пабудавання кампазіцыі кадра, а таксама апрацоўку фатаграфій расказаў фотакарэспандэнт абласной газеты «Віцебскія весці» Дзмітрый Осіпаў.
Спецыяльны карэспандэнт інфармацыйнага агенцтва «Мінск-Навіны», галоўны рэдактар дабрачыннай інтэрнэт-платформы «Крылы» Вікторыя Аль Алі правяла майстармайнд па вядзенні акаўнтаў устаноў бібліятэчнай сістэмы ў папулярных сацыяльных сетках, які дазволіў удзельнікам з розным вопытам убачыць сваю работу з рознабаковых пунктаў гледжання і падзяліцца вопытам вырашэння агульных праблем.
На працягу года аддзел бібліятэказнаўства плануе розныя анлайн- і афлайн-мерапрыемствы для павышэння кваліфікацыі бібліятэкараў і ўдасканалення рэгулярнай работы з супольнасцямі ў сацыяльных сетках. Для фарміравання цэласнага пазітыўнага іміджу бібліятэчнай сістэмы Віцебскай вобласці будзе развівацца культура абмену ведамі і досведам работы.


































