
Вечар-партрэт «Годы были прожиты честно и не зря»
- Details
- Створана 10.05.2023 10:15
1 мая споўнілася 100 гадоў з дня нараджэння ганаровага грамадзяніна г. Віцебска, былога першага сакратара Віцебскага абкама партыі Сяргея Міхайлавіча Шабашова.
Да гэтай знамянальнай даты Віцебскай абласная бібліятэка сумесна з Віцебскім абласным саветам Беларускага грамадскага аб'яднання ветэранаў прымеркавала вечар-партрэт «Годы были прожиты честно и не зря», які адбыўся 4 мая.
Пра асобу Сяргея Шабашова, яго вялікі ўнёсак у развіццё вобласці сказаў намеснік начальніка галоўнага ўпраўлення ідэалагічнай работы і па справах моладзі Віцебскага аблвыканкама Анатоль Гуцуляк. Вядучая вечара, загадчык аддзела краязнаўства Ларыса Рагачова нагадала ўсім пра кіраўнікоў вобласці, кіраўнікоў абласной партыйнай арганізацыі, якія ў розныя гады працавалі на карысць Віцебскага краю. Супрацоўнікамі бібліятэкі была падрыхтавана змястоўная электронная прэзентацыя пра Сяргея Шабашова і арганізавана выстава-прагляд кніг «Віцебская вобласць – вехі гісторыі».
Старшы навуковы супрацоўнік Лёзненскага ваенна-гістарычнага музея Сняжана Макравусава расказала пра матэрыялы, прысвечаныя знакамітаму земляку, якія захоўваюцца ў музеі, і асноўныя вехі яго жыццёвага шляху. З песняй «Ой бярозы ды сосны», якую вельмі любіў Сяргей Шабашоў, выступіў народны фальклорны калектыў «Медуніца» пад кіраўніцтвам Ганны Макравусавай Дома культуры агрогарадка Адаменкі Лёзненскай ЦКС. Успамінамі пра сумесную работу, сяброўства з Сяргеем Шабашовым падзяліліся ветэраны Іосіф Навумчык і Пётр Сусалка. Загадчык аддзела інфармацыйна-пошукавых сістэм і аўтаматызаваных архіўных тэхналогій Дзяржаўнага архіва Віцебскай вобласці Алена Бондарава расказала пра асабісты фонд Сяргея Шабашова і прадэманстравала некаторыя з фотаздымкаў, што захоўваюцца ў архіве. Словы ўдзячнасці ўдзельнікам мерапрыемства і ўсім, хто захоўвае памяць пра Сяргея Шабашова, сказалі член Віцебскага абласнога савета Беларускага грамадскага аб'яднання ветэранаў Зоя Крот і Канстанцін Шабашоў, сын Сяргея Міхайлавіча.
Вечар упрыгожылі любімыя песні Сяргея Шабашова, якія прагучалі ў выкананні Вольгі Кір'янчык, Галіны Калінінай і Сяргея Лузгіна.


































