
Інтэрнацыянальная гасцёўня «Музычны мост сяброўства»
- Details
- Створана 19.05.2023 09:17
18 мая ў аддзеле выданняў на замежных мовах адбылася інтэрнацыянальная гасцёўня «Музычны мост сяброўства».
Мерапрыемства прымеркавана да Сусветнага дня культурнай разнастайнасці ў імя дыялогу і развіцця. Гэтая ўрачыстасць нагадвае ўсяму свету пра каштоўнасці кожнай нацыянальнасці і садзейнічае супрацоўніцтву, дасягненню міру, стабільнасці і развіццю сувязей паміж народамі.
Замежныя студэнты, якія атрымліваюць адукацыю ва УА «Віцебская ордэна «Знак пашаны» дзяржаўная акадэмія ветэрынарнай медыцыны», УА «Віцебскі дзяржаўны ордэна Дружбы народаў медыцынскі ўніверсітэт», УА «Віцебскі дзяржаўны ўніверсітэт імя П. М. Машэрава» і Віцебскім філіяле Міжнароднага ўніверсітэта «МІПСА», пазнаёмілі публіку з музычнай культурай сваіх краін. Госці мерапрыемства пачулі святочную сямейную песню на мове зулу ў выкананні студэнткі з Дэмакратычнай Рэспублікі Конга. Джазавы хіт «Які цудоўны свет!» прадставіў студэнт з Рэспублікі Гана. Запамінальнымі былі выступленні танцораў з астраўной дзяржавы Шры-Ланка і Рэспублікі Індыя. Яны прапанавалі гледачам нацыянальныя танцы. Ланкійскі гурт «Мікс Фідс» з запалам выканаў вулічныя танцы ў стылі хіп-хоп. Сапаргулыева Айгул грала на дутары нацыянальную туркменскую мелодыю «Гэта рай».
У «Музычным мосце сяброўства» прымалі актыўны ўдзел студэнты УА «Віцебскі дзяржаўны музычны каледж імя І. І. Салярцінскага». Анастасія Гамзюк выступіла з песняй «Сэрца зямлі маёй». Дыяніс Шлапакоў і Дзмітрый Бардок узнавілі нацыянальныя класічныя творы на гітары і акардэоне.
Навучэнцы ДУА «Гімназія № 9 г. Віцебска імя А. П. Белабародава» Герман Міхайлаў і Артур Мядзведзеў праспявалі знакаміты французскі хіт Д. Дасэна «L'été indien».
У мерапрыемстве прыняў удзел калектыў Віцебскага грамадскага аб'яднання «Гарадская яўрэйская абшчына». Дзеці з абшчыны чыталі вершы на іўрыце і выканалі песню-дэвіз валанцёрскага цэнтра «Лулаў» «Спяшайцеся рабіць добрыя справы».
Завяршылася інтэрнацыянальная гасцёўня фотасесіяй.


































