
Адкрыццё выставы «СЕМЬЯ ПО ДУХУ: вместе в царстве земном и в Царстве Небесном»
- Details
- Створана 19.07.2023 11:39
18 ліпеня ў рамках мэтавай комплекснай праграмы «Живое слово мудрости духовной» у бібліятэцы адбылося адкрыццё выставы «СЕМЬЯ ПО ДУХУ: вместе в царстве земном и в Царстве Небесном». Выстава падрыхтавана да 105-годдзя са дня гібелі царскіх пакутнікаў.
У 1918 годзе члены сям'і апошняга расійскага імператара Мікалая II паўтарылі подзвіг пакутнікаў. Адчуваючы набліжэнне немінучай гвалтоўнай смерці, яны да канца захоўвалі душэўнае святло, знаходзіліся ў любові і хрысціянскім аднадумстве.
Мерапрыемства пачалося з малебна ў духоўна-асветніцкім цэнтры бібліятэкі, які правёў клірык храма Дабравешчання Прасвятой Багародзіцы горада Віцебска протаіерэй Ігар Машкей.
Адкрылі выставу прывітальным словам дырэктар бібліятэкі Таццяна Адамян, протаіерэй Ігар Машкей і супрацоўнік епархіяльнай бібліятэкі святой велікамучаніцы Кацярыны Ксенія Каратчук.
Экспазіцыя ўключае літаратуру з фондаў абласной бібліятэкі, асабістай бібліятэкі архіепіскапа Віцебскага і Аршанскага Дзімітрыя, праваслаўнай бібліятэкі імя А. П. Сапунова Віцебскай духоўнай семінарыі, епархіяльнай бібліятэкі святой велікамучаніцы Кацярыны і бібліятэкі святой велікамучаніцы Ірыны з прадстаўніцтвам Беларускага экзархата пры Патрыяршым падворку (г. Масква), а таксама экспанаты Царкоўна-археалагічнага музея Віцебскай епархіі.
Загадчык агульнай чытальнай залы Таццяна Патоцкая правяла агляд выставы.
Частка выставы прысвечана блізкім па духу царскай сям'і людзям. Сярод іх вялікая княгіня Елізавета Фёдараўна, пра жыццё якой расказала Вераніка Пруднікава, псіхолаг дабрачыннага фонду падтрымкі сям'і, мацярынства і дзяцінства «Пакроў».
Разам з царскай сям'ёй загінуў і Яўген Боткін. Пра маральны подзвіг лейб-медыка царскай сям'і прадставіла даклад выкладчык Магілёўскага медыцынскага каледжа Антаніна Антоненка.
Кнігі, прадстаўленыя на выставе, несумненна, будуць цікавыя чытачам розных пакаленняў і дазволяць адкрыць для кожнага новыя старонкі жыцця апошняга расійскага імператара і яго бліжэйшага акружэння.
Азнаёміцца з экспазіцыяй можна на 3-м паверсе бібліятэкі да 20 жніўня.


































