
Віцебская абласная бібліятэка на ХХХ Дні беларускага пісьменства
- Details
- Створана 05.09.2023 07:20
Віцебская абласная бібліятэка імя У. І. Леніна 2–3 верасня 2023 года прадстаўляла на ХХХ Дні беларускага пісьменства ў Гарадку маштабную кніжную экспазіцыю, у якую ўвайшлі звыш за 100 лепшых кніг пра наш рэгіён.
Пра гісторыю і сучаснасць вобласці расказаў раздзел «Віцебская вобласць: вехі гісторыі». Сярод прадстаўленых выданняў – «Верхні замак Віцебска (IX–XVIII стст.)» Леаніда Каледзінскага, зборнікі дакументаў «Віцебская губерня», выдадзеныя абласным архівам, кнігі віцебскага гісторыка Мікалая Півавара і іншыя.
Наведвальнікі пазнаёміліся з творчасцю і выданнямі літаратараў паўночнага рэгіёна – калектыўнымі і аўтарскімі паэтычнымі зборнікамі. Многія выданні выйшлі невялікімі тыражамі, іх можна знайсці толькі ў фондах абласной бібліятэкі.
Шматлікая дэлегацыя на чале са старшынём Віцебскага абласнога аддзялення грамадскага аб'яднання «Саюз пісьменнікаў Беларусі» Тамарай Красновай-Гусачэнка прэзентавала альманах «Дзвіна: Віцебшчына літаратурная», які аб'яднаў на 350 старонках творы 33 аўтараў Віцебшчыны. Перад гледачамі ў Гарадку выступілі Мікалай Намеснікаў, Сяргей Трафімаў, Ірына Радзіхоўская, Сяргей Красоў, Мікалай Гарбачоў, Тамара Кавалёва, Іна Мароз і іншыя.
Тэму Вялікай Айчыннай вайны і генацыду на тэрыторыі вобласці раскрыла экспазіцыя «Беларусь памятае» з кнігамі «Глыбоцкае гета», «Без тэрміна даўнасці. Беларусь. Віцебская вобласць», іншымі. Стэнд выклікаў актыўную цікавасць у гасцей свята, яны фатаграфаваліся з Ларысай Бруевай, аўтарам кнігі «Пакуль не пахаваны апошні салдат», Людмілай Нікіцінай, аўтарам кнігі «Заронава памятае». Супрацоўнікі Лёзненскага ваенна-гістарычнага музея дзякавалі за прадстаўленыя на экспазіцыі буклеты пра подзвігі на сваёй зямлі.
Зборнікі матэрыялаў «Віцебскі край» прыцягнулі ўвагу Кіраўніка Усвяцкага раёна Пскоўскай вобласці Дзмітрыя Пятрова, які выказаў зацікаўленасць ва ўдзеле расійскіх даследчыкаў у навукова-практычнай краязнаўчай канферэнцыі ў 2023 годзе.
Маляўнічыя і эксклюзіўныя выданні пра народны касцюм, саломапляценне і мясцовых майстроў народнай творчасці сталі асобнай часткай выставачнага праекта. Пра літаратурныя сталіцы Віцебскай вобласці – Глыбокае, Орша, Полацк, Паставы і Гарадок, якія ў розныя гады прымалі Дзень беларускага пісьменства, распавёў блок «Вітаю цябе, беларуская кніга!».
У год 120-годдзя з дня нараджэння ўраджэнца Віцебска пісьменніка Лазара Лагіна і 85-годдзя першага выдання чароўнай аповесці-казкі «Стары Хатабыч» бібліятэка пры падтрымцы рэдакцыі газеты «Віцьбічы» праводзіць конкурс аўтарскіх кніжных ілюстрацый «Малюем чароўны свет Хатабыча». Лепшыя работы ўдзельнікаў конкурсу былі прадстаўлены для галасавання гледачоў на свяце ў Гарадку, а ўзнагароду пераможцу ўручаць у Дзень бібліятэк Беларусі.
Выставачны павільён Віцебскай абласной бібліятэкі наведалі віцэ-прэм'ер Ігар Петрышэнка, старшыня Віцебскага аблвыканкама Аляксандр Субоцін, памочнік Прэзідэнта – інспектар па Віцебскай вобласці Ігар Брыло, міністр інфармацыі Уладзімір Перцоў і іншыя афіцыйныя госці Дня беларускага пісьменства, якія таксама вызначылі сваіх фаварытаў сярод аўтараў кніжных ілюстрацый.
Экскурсію па бібліятэчнай экспазіцыі праводзіў у вобразе Францыска Скарыны полацкі паэт Аляксандр Раткевіч. За памятнай паштоўкай з аўтографам першадрукара і філосафа-гуманіста стаяла чарга з наведвальнікаў.
Удзел Віцебскай абласной бібліятэкі імя У. І. Леніна ў ХХХ Дні беларускага пісьменства ў Гарадку быў цікавым і пазнавальным і для гасцей павільёна, і для ўдзельнікаў дэлегацыі, і, безумоўна, стаў важным крокам у развіцці культурнага жыцця рэгіёна і падтрымцы беларускай літаратуры.


































