
Творчы вечар Людмілы Хмяльніцкай
- Details
- Створана 13.02.2012 07:01
8 лютага ў аддзеле літаратуры па мастацтве адбыўся творчы вечар гісторыка, дырэктара Музея Марка Шагала Людмілы Уладзіміраўны Хмяльніцкай.

Л. У. Хмяльніцкая скончыла гістарычны факультэт БДУ. Працавала ў Віцебскім абласным краязнаўчым і мастацкім музеях. З 1998 года – дырэктар Музея Марка Шагала. Удзельнічае ў рэгіянальных і міжнародных навуковых канферэнцыях. З'яўляецца галоўным рэдактарам беларускага гістарычнага навукова-папулярнага часопіса "Вiцебскi сшытак", "Бюлетэня Музея Марка Шагала", а таксама шэрагу навуковых выданняў. Аўтар кніг і мноства артыкулаў на гістарычныя тэмы. Член міжнароднай асацыяцыі беларусістаў. Людміла Хмяльніцкая адзначана дзяржаўнай узнагародай Латвіі – Крыжом Прызнання IV ступені. Гэту высокую ўзнагароду ёй уручыў прэзідэнт Латвіі Валдзіс Затлерс. Такім чынам, урад балтыйскай краіны адзначыў уклад Л. Хмяльніцкай у развіццё культурнага супрацоўніцтва паміж Беларуссю і Латвіяй.
На вечары Л. У. Хмяльніцкая распавяла пра сябе, пра свае планы. Расказ суправаджаўся паказам электроннай прэзентацыі з фатаграфіямі з асабістага архіва Людмілы Уладзіміраўны. Паглядзеўшы фільм "Летняя школа-2008", удзельнікі сустрэчы атрымалі магчымасць больш падрабязна пазнаёміцца з адным з найбольш цікавых праектаў Музея Марка Шагала па рабоце з юнымі дараваннямі не толькі Віцебска, Беларусі, але і замежных краін. На разгорнутай у аддзеле выставе "Старонкі гісторыі праз прызму публікацый Людмілы Хмяльніцкай" былі прадстаўлены кнігі, перыядычныя выданні, асобныя артыкулы, аўтарам і рэдактарам якіх з'яўляецца Людміла Уладзіміраўна. У трэцяй частцы мерапрыемства ўсе жадаючыя маглі задаць пытанне або выказаць сваё меркаванне праз "свабодны мікрафон". Былі выказаны словы падзякі ў адрас Л. У. Хмяльніцкай, узняты праблемныя пытанні ў вобласці музейнай справы. На сустрэчы гучала музыка ў выкананні выкладчыкаў дзіцячых музычных школ і каледжа імя І. І. Салярцінскага В. Дарэнскіх, А. Шэйнінай, В. Вярбіцкай, Э. Прыволька, Г. Ушаковай, М. Рубіна.



































