
Выстава «Пушкінскі запаведнік. Да 125-годдзя»
- Details
- Створана 06.12.2023 09:37
Дырэктар Віцебскай абласной бібліятэкі імя У. І. Леніна Таццяна Адамян і дырэктар Дзяржаўнага мемарыяльнага гісторыка-літаратурнага і прыродна-ландшафтнага музея-запаведніка Аляксандра Пушкіна «Міхайлаўскае» Георгій Васілевіч адкрылі 5 снежня 2023 года выставу «Пушкінскі запаведнік. Да 125-годдзя».
У галерэі першага паверха бібліятэкі прадстаўлены 9 банерных палотнаў з расповедам пра гісторыю Пушкінскага запаведніка, які быў заснаваны ў 1899 годзе. Музей-запаведнік «Міхайлаўскае», размешчаны ў пасёлку Пушкінскія горы, з'яўляецца помнікам рускай культуры сусветнага значэння. Менавіта тут Аляксандрам Пушкіным былі створаныя трагедыя «Борис Годунов»», цэнтральныя раздзелы рамана «Евгений Онегин», паэма «Граф Нулин», скончана паэма «Цыганы», задуманы «Маленькие трагедии», напісаны вершы «Деревня», «Я помню чудное мгновенье» і многія іншыя. Уражанні ад рускай прыроды, прывабнасць старажытнай пскоўскай зямлі з яе «высокароднымі курганамі» і гарадзішчамі, зносіны з мясцовымі жыхарамі падчас знаходжання ў Міхайлаўскім паглыбілі і аформілі гістарычныя інтарэсы Пушкіна. Духоўнае перараджэнне, адчутае паэтам у сядзібе, ўзбагаціла яго як чалавека і як мастака-творцу, дало імпульс усёй творчасці ў далейшым.
У межах Пушкінскага запаведніка налічваецца каля 100 аб'ектаў культурнай і археалагічнай спадчыны федэральнага значэння. На яго тэрыторыі знаходзіцца магіла паэта, музеі-сядзібы «Міхайлаўскае», «Трыгорскае», «Пятроўскае» з мемарыяльнымі паркамі XVIII–XIX стагоддзяў, якія ўваходзяць у іх склад. Больш падрабязна даведацца пра кожную з гэтых славутасцяў можна, калі адсканаваць qr-код на банеры з аб'ектам, які цікавіць.
Выстава арганізавана ў рамках пагаднення аб супрацоўніцтве паміж абласной бібліятэкай і Пушкінскім запаведнікам і прадоўжыцца да 5 студзеня 2024 года.


































