
Усе жанчыны прыгожыя і хараством сваім, і розумам
- Details
- Створана 07.03.2024 15:18
Упершыню напярэдадні Дня жанчын у Віцебскай абласной бібліятэцы адбылася інтэлектуальная гульня «Бібліяквіз», галоўнымі ўдзельнікамі якой сталі самі супрацоўнікі бібліятэкі.
Ідэю правядзення карпаратыўнага спаборніцтва прапанавалі і арганізавалі аддзелы бібліятэказнаўства і маркетынгу, а адміністрацыя і першасная прафсаюзная арганізацыя падтрымалі гэтую ініцыятыву.
З прадстаўнікоў усіх аддзелаў і падраздзяленняў выпадковым чынам былі сфарміраваны 8 каманд з 8–10 гульцоў. Пытанні і заданні ў 7 турах былі разнапланавымі і... нечаканымі. Тэматыка квіза была блізкая ўсім прысутным – гэта кнігі, чытанне і бібліятэчная дзейнасць.
Размінка пачалася з цікавых фактаў пра саму бібліятэку – яе гісторыю і будынак, якія здзівілі нават самых дасведчаных супрацоўнікаў. Напрыклад, што ў 1931 годзе бібліятэка працавала штодзень, але з трохгадзінным перапынкам.
У туры «Што ў імені табе маім» лёгка ўгадвалі псеўданімы і сапраўдныя імёны, прозвішчы пісьменнікаў, паэтаў, а таксама цытаты персанажаў.
Тур «Кніга ў кадры» быў прысвечаны кнігам і фільмам. Не ўсе ўспомнілі колькасць дачок у рамане «Гонар і прадузятасць» Джэйн Осцін, але беспамылкова назвалі імёны Джоан Роўлінг, Джорджа Р. Р. Марціна і Маргарэт Мітчэл, паводле твораў якіх былі знятыя самыя папулярныя фільмы і серыялы.
Пазнаць пісьменнікаў, паэтаў і персанажаў па фота ў туры «Суцэльны негатыў» было няпроста. Але самыя ўважлівыя правільна адказалі на пастаўленыя пытанні.
Тур «Усе мы родам з дзяцінства» быў прысвечаны літаратурным творам для дзяцей і пра дзецей. Гульцы ўпэўнена адказвалі на пытанні, у тым ліку беспамылкова ўказалі чарговасць радкоў у «Калыханцы» на вершы Генадзя Бураўкіна і музыку Васіля Раінчыка.
З рэбусамі па назвах кніг у туры «Угадай кнігу па карцінках» каманды справіліся датэрмінова.
Фінальны тур «Літара за літарай» быў самым азартным і цікавым: бібліятэкары адказвалі на пытанні па сюжэтах кніг.
Дзве гадзіны гульні праляцелі хутка, і варта адзначыць, што ўсе каманды ішлі з мінімальным адрывам па колькасці балаў, раскрыўшы сваю эрудыцыю і любоў да літаратуры. Фіналісты сталі шчаслівымі ўладальнікамі прызоў, прадстаўленых першаснай прафсаюзнай арганізацыяй і адміністрацыяй бібліятэкі, а каманда, якая заняла ганаровае 8 месца, атрымала суцяшальны прыз.
У працяг святочнай тэмы адбылася музычна-забаўляльная праграма «Усе жанчыны прыгожыя». Настаўнікі і навучэнцы Дзіцячай школы мастацтваў №5 г. Віцебска падарылі па-вяснавому яркія канцэртныя нумары, віктарыны, конкурсы і святочны настрой.


































