
Дзіцячае музычна-спартыўнае свята «Кірмаш “Таленты без межаў”»
- Details
- Створана 08.04.2024 14:35
Дзіцячае музычна-спартыўнае свята «Кірмаш "Таленты без межаў"» аб'яднала 6 красавіка ў абласной бібліятэцы людзей з абмежаванымі магчымасцямі здароўя і рознабаковымі здольнасцямі.
Сустрэча ў межах бібліятэчнага праекта «Разам» запрасіла да ўдзелу сябраў гарадскіх грамадскіх аб'яднанняў «Беларускае таварыства інвалідаў па зроку», «Беларускае таварыства інвалідаў», «Беларускае таварыства глухіх», наведвальнікаў аддзяленняў сацыяльнай рэабілітацыі і абілітацыі інвалідаў.
Свята для дзяцей з рознымі спартыўнымі магчымасцямі пачалося з дынамічнай зарадкі разам з роставым персанажам Шарыкам. Дзеці ў суправаджэнні бацькоў і педагогаў пад вясёлую музыку прайшлі некалькі эстафет «Перанясі мяч», «Скруці стужку», «Злаві метэарыт» і іншыя. Напрыканцы ўсіх удзельнікаў чакалі падарункі.
Рабяты разам з казачнымі героямі з задавальненнем удзельнічалі ў вясёлых конкурсах, адгадвалі загадкі, спявалі і танчылі, чыталі вершы. Актыўны здаровы адпачынак і зносіны, выпрацоўка ўпэўненасці ў сваіх сілах, сацыяльная абілітацыя дзяцей з абмежаванымі магчымасцямі здароўя і інтэграцыя ў грамадства – усе задачы свята былі вырашаны паспяхова.
Запальны танец «Кукарача» ў выкананні танцавальнага калектыву «Ча-Ча-Ча» ДУ «Тэрытарыяльны цэнтр сацыяльнага абслугоўвання насельніцтва Чыгуначнага раёна г. Віцебска» ператварыўся ў неверагодны флэшмоб. Госці і ўдзельнікі свята не змаглі ўтрымацца на месцах і падключыліся да танцавальных рытмаў жартаўлівай мексіканскай песні.
Прагучалі музычныя нумары ў выкананні Алісы Селіванавай, Юліі Сакаловай, Мікіты Калакольчыкава, Веры і Марыны Калодкіных. Людміла Селіванава выканала «Песенку о медведях» Аіды Ведзішчавай з кінафільма «Кавказская пленница».
За ролю лепшага вядучага забаўляльнага шоў змагаліся аўтар сцэнарыя, рэжысёр-пастаноўшчык свята, інвалід па зроку I групы Ларыса Тумінская і галоўны трэнер Нацыянальнай зборнай Рэспублікі Беларусь па міні-футболе для татальна невідушчых Алег Кірылаў. Яны паказалі свае творчыя нумары гасцям і ўдзельнікам мерапрыемства.
Кірмаш «Таленты без межаў» стаў для дзяцей магчымасцю раскрыць свой творчы патэнцыял, выйсці на сцэну і паказаць гледачам тое, што яны ўмеюць рабіць, а для дарослых – магчымасцю ўбачыць радасць, захапленне і ўсмешкі на тварах дзяцей.


































