
Сустрэча з лётчыкам-выпрабавальнікам Марынай Паповіч
- Details
- Створана 10.09.2012 14:20
6 верасня ў Віцебскай абласной бібліятэцы імя У. І. Леніна адбылася сустрэча «Жыццё – вечны ўзлёт» з вядомым лётчыкам-выпрабавальнікам 1-га класа, інжынерам-палкоўнікам, Героем Сацыялістычнай Працы, легендарнай «Мадам МіГ» Марынай Лаўрынаўнай Паповіч. Мінулы вечар стаў рэальным увасабленнем Дагавора аб супрацоўніцтве, які быў падпісаны паміж абласной бібліятэкай і міжнародным Інстытутам кіравання (г. Архангельск).
Марына Лаўрынаўна Паповіч удастоена пяці міжнародных узнагарод, у тым ліку Залатога і Сярэбранага медалёў імя С. П. Каралёва, Вялікага Залатога медаля Міжнароднай авіяцыйнай федэрацыі. З'яўляецца аўтарам і сааўтарам кніг: «Жизнь – вечный взлет» (у сааўтарстве з Т. Кажэўнікавай), «Хождение за два маха», «Сестры Икара», «Старт над облаками», «Автограф в небе», «НЛО над планетой Земля», «Магия неба»; некалькіх кінасцэнарыяў да фільмаў; аўтарам сотні сусветных рэкордаў. З 2007 года па цяперашні час М. Л. Паповіч – віцэ-прэзідэнт Міжнароднага Цэнтра Рэрыхаў. Людзі розных пакаленняў, якія прыйшлі на сустрэчу, атрымалі магчымасць пачуць расказ Марыны Лаўрынаўны пра сябе, пра блізкіх ёй людзей, пра цікавыя падзеі, удзельніцай якіх яна была. Гэты расказ дапоўнілі ўрыўкі з фільма пра М. Л. Паповіч. Неаднаразова падчас выступлення Марына Лаўрынаўна гаварыла пра любоў да Беларусі, пра свае беларускія карані.
Са словамі прывітання ад кіраўніцтва вобласці на сустрэчы выступіла начальнік упраўлення культуры Віцебскага аблвыканкама Ларыса Канстанцінаўна Аленская. У адрас Марыны Лаўрынаўны прагучала шмат цёплых слоў ад афіцэраў-ветэранаў, якія прыйшлі на сустрэчу. Прэзідэнт міжнароднага Інстытута кіравання (г. Архангельск) А. М. Яжоў і прарэктар па міжнародных, міжрэгіянальных адносінах М. П. Собалеў пазнаёмілі прысутных з грамадскай дзейнасцю Марыны Лаўрынаўны, з яе укладам у работу інстытута, з тымі мерапрыемствамі, у якіх яна прымае самы актыўны ўдзел.
У чытальнай зале бібліятэкі была аформлена кніжная выстава. Шматлікія госці, якія прыйшлі на сустрэчу, змаглі пазнаёміцца з кнігамі М. Л. Паповіч і публікацыямі пра яе. Марына Лаўрынаўна падарыла бібліятэцы свае новыя кнігі.
















































