
Інтэрнацыянальная гасцёўня «У сяброўстве народаў вялікая сіла»
- Details
- Створана 23.05.2024 10:48
У рамках Сусветнага дня культурнай разнастайнасці ў імя дыялогу і развіцця 21 мая ў бібліятэцы адбылася інтэрнацыянальная гасцёўня «У сяброўстве народаў вялікая сіла».
У атмасферы талерантнасці, павагі і сяброўства замежныя студэнты ВНУ горада паказалі нацыянальныя асаблівасці і ўнікальнасць сваёй культуры праз гукі народных інструментаў, мелодыі песень на розных мовах і танцы.
Па-беларуску гасцінна пачаўся канцэрт з выступлення студэнтаў УА «Віцебскі дзяржаўны музычны каледж імя І. І. Салярцінскага». Дар'я Лугаўцова і Наталля Гарэлышава выканалі песню «Тучи в голубом». Дуэт баяністаў Ілона Вазняк і Дзмітрый Бардок нагадалі пра драматычныя падзеі гісторыі нашага народа, выканаўшы папулярную песню Мацвея Блантэра «Катюша» ў сучаснай апрацоўцы.
Падчас мерапрыемстваў харэаграфічныя калектывы «Індаф'южэн» (Індыя) і «Міксфід» (Шры-Ланка) з УА «Віцебскі дзяржаўны ордэны Дружбы народаў медыцынскі ўніверсітэт» пазнаёмілі гледачоў з галоўным элементам індыйскай і ланкійскай культуры – нацыянальным танцам. Традыцыі гэтага танца сыходзяць каранямі ў тысячагадовую гісторыю. У кожным руху змяшчаецца пасланне гледачу: жэст цела, рук, вачэй, мімікі гэтак жа значны, як слова ў вялікай паэме.
Візіткай з Кітая стаў музычны нумар у выкананні Юнь Вэньбін. Ён прадставіў магчымасць пачуць матаўрын (або марынхур) – мангольскі смычковы інструмент, які вельмі распаўсюджаны ў яго краіне. Вынаходства гэтай музычнай прылады легенда звязвае з хлопчыкам Сухэ, які так ўвекавечыў свайго любімага каня. З тых далёкіх стагоддзяў, галоўка грыфа інструмента заўсёды выраблена ў выглядзе галавы каня. Не менш яркім быў танцавальны нумар Вань Чжыхаа і Тан Цзінь. Марудлівыя і плаўныя рухі танца ўвасобіліся ў спектакль пра каханне. Гэтыя таленавітыя дзеці атрымліваюць адукацыю ва УА «Віцебскі дзяржаўны ўніверсітэт імя П. М. Машэрава».
Хунджові Рэйс Пірэс Данке з Беніна, франкамоўнай дзяржавы ў Заходняй Афрыцы, – студэнт УА «Віцебскі філіял Міжнароднага ўніверсітэта «МІПСА». Ён прачытаў верш «Маладыя гады» беларускага пісьменніка Максіма Багдановіча.
Яркім і запамінальным было выступленне дружнага калектыву з Віцебскага яўрэйскага дома. З дзіцячым запалам прагучаў вершаваны інтэрактыў на іўрыце. У выкананні знакамітай сям'і Перэльман прагучала ўсім вядомая «Купалінка». Ансамбль «Наша песня» віртуозна і душэўна выканаў папулярныя матывы на ідыш.
Расійскія студэнты УА «Віцебскі дзяржаўны тэхналагічны ўніверсітэт» Іван Архіпаў і Кірыл Андрэянаў прадставілі ўвазе слухачоў вядомы твор класіка рускай літаратуры А. С. Пушкіна «Евгений Онегин».
Заключным акордам канцэрта стала выступленне расійскай студэнткі УА «Віцебская ордэна «Знак пашаны» дзяржаўная акадэмія ветэрынарнай медыцыны» Анастасіі Івановай з песняй «Матушка Земля».
Усіх удзельнікаў аб'яднала мова музыкі, якую разумеюць усе народы, нягледзячы на нацыянальныя і культурныя адрозненні.


































