
«Лабараторыя поспеху: ад ідэі да бізнесу»: Тэлерадыёкампанія «Віцебск»
- Details
- Створана 23.05.2024 14:50
У савецкі час тэлевізар быў акном у свет, а дыктары і вядучыя тэлепраграм успрымаліся гледачамі як родныя і блізкія людзі.
У фільме «Москва слезам не верит» прагучала думка: «Скоро ничего не будет. Ни кино, ни театра, ни книг, ни газет – одно сплошное телевидение». Аднак жыццё паказвае, што і тэатр, і бібліятэкі, і тэлебачанне існуюць да гэтага часу, нават у век інтэрнэту. Гэтай думкай падзяліліся на сустрэчы са школьнікамі супрацоўнікі Тэлерадыёкампаніі «Віцебск», якія прыйшлі ў абласную бібліятэку паўдзельнічаць у праекце «Лабараторыя поспеху: ад ідэі да бізнесу». У мерапрыемстве прынялі ўдзел вядучыя праграмы «Вячэрні Віцебск», а таксама сувядучыя ў тэлепраекце «Дадому ў невядомае» Іван Паючэнка і Сяргей Маркаў.
Старшакласнікі школы № 11 імя М. М. Бахціна даведаліся цікавыя факты з гісторыі віцебскай тэлестудыі, з якімі іх пазнаёміла загадчык агульнай чытальнай залы Таццяна Патоцкая. Спікеры, рэдактары віцебскага тэлебачання, расказалі пра асаблівасці тэлевізійнай работы, пра веды і навыкі сучасных супрацоўнікаў медыяіндустрыі, падзяліліся асабістымі гісторыямі з вопыту сваёй працы.
Усім было цікава даведацца, як выглядае свет тэлебачання знутры. Як праходзіць дзень вядучых тэлекафэ «Вячэрні Віцебск»? Як здымаюць перадачы пра падарожжы па Віцебшчыне?
Калі прафесіяналы сваёй справы расказваюць каму-небудзь пра сваю работу, гэта заўсёды вельмі цікава. Іван Паючэнка і Сяргей Маркаў шчыра падзяліліся з дзецьмі сакрэтамі тэлекухні: колькі неабходна часу на падрыхтоўку тэлеперадачы, якія этапы праект праходзіць ад ідэі да ўвасаблення на экране, а таксама расказалі, якія кур'ёзныя выпадкі адбываліся падчас здымак.
У фінале мерапрыемства супрацоўнікі тэлестудыі падкрэслілі важную думку для школьнікаў: ужо сёння мае каласальнае значэнне пашырэнне кругагляду і пастаяннае дынамічнае навучанне. Гэта трэба пачаць рабіць ужо зараз, каб набыць практычныя навыкі, важныя ў любой прафесіі.
Праект «Лабараторыя поспеху: ад ідэі да бізнесу» ідзе на летнія канікулы, каб прадоўжыць сустрэчы ў верасні 2024 года.


































