
Прэзентацыя факсімільнага выдання Жухавіцкага Евангелля
- Details
- Створана 24.05.2024 09:33
Напярэдадні Дня славянскага пісьменства і культуры і Дня памяці святых роўнаапостальных Кірыла і Мяфодзія ў Віцебскай абласной бібліятэцы імя У. І. Леніна прэзентавалі факсімільнае выданне Жухавіцкага Евангелля, ініцыятарам выпуску якога выступіў Замкавы комплекс «Мір».
З прывітальным словам выступіў протаіерэй Андрэй Смольскі, кіраўнік аддзела рэлігійнай адукацыі і катэхізацыі Віцебскай епархіі. Святар Арцемій Залатухін, выкладчык Віцебскай духоўнай семінарыі, расказаў пра найбольш значныя і вядомыя Евангеллі, створаныя на тэрыторыі Беларусі, і гісторыю бытавання свяшчэнных кніг.
Вучоны сакратар музея «Замкавы комплекс «Мір» Ігар Ложачнік прадставіў факсімільнае выданне Жухавіцкага Евангелля і падзяліўся дэталямі працы па ўзнаўленні святыні ў рамках Культурнага праекта «Даследаванне і факсімільнае выданне помніка беларускага пісьменства – Жухавіцкага Евангелля XVI стагоддзя» з фондаў Бібліятэкі імя Урублеўскіх Літоўскай акадэміі навук. Напрыклад, выявы чатырох евангелістаў Матфея, Марка, Лукі і Іаана, выкананыя ў арыгінале кінавар'ю ініцыялы, застаўкі, загалоўкі адноўленыя з максімальным трапленнем у колер. Праца над факсімільным выданнем стала зыходным пунктам цэлага шэрагу даследаванняў па вывучэнні гісторыі Замкавага комплексу, лінгвістычных і культурных асаблівасцей рэгіёну.
Сустрэча ў рамках мэтавай комплекснай праграмы «Жывое слова мудрасці духоўнай» сабрала прадстаўнікоў Віцебскай епархіі, навучэнцаў Віцебскага дзяржаўнага індустрыяльнага каледжа, бібліятэкараў і ўсіх, хто цікавіцца гэтай тэмай.
Велікодныя спевы і «Гімн святым Кірылу і Мяфодзію, асветнікам славян» прагучалі ў выкананні кліраснага хору Храма святой блажэннай Матроны Маскоўскай.
Ігар Ложачнік перадаў у дар Віцебскай абласной бібліятэцы адно з выданняў Замкавага комплексу «Мір».
Азнаёміцца з унікальным факсіміле Жухавіцкага Евангелля можна ў выставачнай зале «ExLibris».


































