
Абласны семінар «Бібліятэчнае абслугоўванне: сучасныя падыходы і пошук новых фарматаў»
- Details
- Створана 24.05.2024 14:01
Аддзел бібліятэказнаўства Віцебскай абласной бібліятэкі імя У. І. Леніна арганізаваў 22–23 мая семінар «Бібліятэчнае абслугоўванне: сучасныя падыходы і пошук новых фарматаў» для загадчыкаў дзіцячых бібліятэк і загадчыкаў аддзелаў абслугоўвання і інфармацыі раённых і гарадскіх сетак публічных бібліятэк Віцебскай вобласці.
Першы дзень семінара прайшоў на пляцоўцы абласной бібліятэкі. Удзельнікаў віталі дырэктар бібліятэкі Таццяна Адамян і галоўны спецыяліст аддзела работы арганізацый сферы культуры ўпраўлення культуры Віцебскага абласнога выканаўчага камітэта Зоя Гукава.
З асноўнымі тэндэнцыямі інфармацыйна-бібліяграфічнага абслугоўвання карыстальнікаў і напрамкамі сацыякультурнай дзейнасці бібліятэк пазнаёміла загадчык аддзела бібліятэказнаўства абласной бібліятэкі Наталля Пугачова.
Загадчык агульнай чытальнай залы Таццяна Патоцкая раскрыла актуальныя падыходы да прыцягнення чытачоў у бібліятэку.
Пра работу Цэнтра чытання і актыўнай творчасці «Бібліяпазл» расказала Вольга Бандарэнка, загадчык дзіцячай бібліятэкі імя Л. М. Талстога – філіяла № 1 Полацкай РЦБС.
Дзейнасць бібліятэк Лепельскай ЦБС па арганізацыі абслугоўвання карыстальнікаў прадставіла загадчык дзіцячай бібліятэкі-філіяла № 1 Вольга Доўнер.
Наталля Цэлічына, загадчык аддзела абслугоўвання і інфармацыі Докшыцкай цэнтральнай раённай бібліятэкі, падзялілася вопытам прадстаўлення ўстановы ў інтэрнет-прасторы і стварэння эфектыўных бібліятэчных праектаў.
Яскравае ўражанне пакінулі наведванне сямейнага свята «Библиотечный КОТ: Книги. Общение. Творчество», у рамках якога адбылося падвядзенне вынікаў конкурсу творчых работ «Кніжны кот Фаліянт», і майстар-клас па паперапластыцы «Сімвалы маёй Радзімы», арганізаваны аддзелам літаратуры па мастацтве.
У рамках семінара ўдзельнікі наведалі Цэнтральную гарадскую бібліятэку імя М. Горкага ЦБС г. Віцебска, пазнаёміліся з новымі формамі і метадамі работы дзіцячай бібліятэкі імя У. Караткевіча і бібліятэкі-філіяла № 19 імя Е. Лось, прынялі ўдзел у майстар-класе па стварэнні кветкавай кампазіцыі.
Другі дзень семінара прайшоў на базе Цэнтральнай бібліятэкі імя А. С. Пушкіна Аршанскай ЦБС і пачаўся з агляднай экскурсіі. Асаблівасцю мерапрыемства стала знаёмства з чытальнай залай «Бібліятэка імя Янкі Сіпакова», для якой пісьменнік падарыў больш за пяць тысяч кніг са сваёй асабістай бібліятэкі.
У рамках круглага стала Аксана Кулагіна, дырэктар Аршанскай ЦБС, асвятліла асноўныя сацыякультурныя праекты сістэмы. З вопытам бібліятэк Аршанскага раёна па арганізацыі працы публічных цэнтраў прававой інфармацыі выступіла бібліятэкар аддзела абслугоўвання і інфармацыі Вольга Лявонава.
Пытанне развіцця культурнай і адукацыйнай прасторы сельскай бібліятэкі раскрыла Людміла Кісялевіч, загадчык Бабініцкай сельскай бібліятэкі-клуба.
Прыемным пунктам праграмы семінара стала наведванне Аршанскага музея У. С. Караткевіча, у экспазіцыі якога прадстаўлена каля 640 прадметаў – гэта асабістыя рэчы пісьменніка, рукапісы яго твораў, малюнкі, а таксама наведванне дзіцячай бібліятэкі імя У. С. Караткевіча, якая размешчана ў велічным будынку былога калегіума езуітаў.


































