
Дзень беларускага пісьменства ў Глыбокім
- Details
- Створана 05.09.2012 10:44
2 верасня супрацоўнікі Віцебскай абласной бібліятэкі прынялі ўдзел ў мерапрыемствах, прысвечаных Дню беларускага пісьменства ў Глыбокім.
Праграмай свята была прадугледжана разгорнутая кніжная выстава, якую ўвазе ўсіх аматараў друкаванага слова прадставілі бібліятэчныя работнікі. Экспазіцыя, якая размясцілася на вуліцы Леніна, складалася з трох асноўных раздзелаў: "Вытокі беларускай духоўнасці", "Гонар і слава роднага краю" і "Вітаю цябе, беларуская кніга!". Першы раздзел быў прысвечаны гісторыі беларускага кнігадрукавання і ўключаў тры падраздзелы: "А напачатку было Слова", "Асветнікі зямлі Полацкай", "Полацк. Цэнтр Еўропы тут!". На кніжных паліцах можна было ўбачыць факсімільнае ўзнаўленне Бібліі, выдадзенай Францыскам Скарынам у 1517–1519 гадах, жыццяпісы славянскага першадрукара, Еўфрасінні Полацкай, Сімяона Полацкага, Льва Сапегі, а таксама літаратуру, прысвечаную гісторыі і сучаснасці старажытнейшага беларускага горада.
Другі раздзел экспазіцыі ўключаў выданні, якія, на думку бібліятэкараў, найбольш яскрава і годна прадстаўляюць Віцебскую вобласць. У падраздзелах "Нам засталася Спадчына", "Прыдзвінскі край на старонках друкаваных выданняў" і "Віцебшчына літаратурная" можна было азнаёміцца з рэпрынтнымі і факсімільнымі выданнямі па гісторыі вобласці, даведацца пра знакамітых майстроў, мастакоў, краязнаўцаў роднага краю, убачыць творы віцебскіх літаратараў.
Трэці раздзел складаўся з наступных падраздзелаў: "Зямля і неба Купалы і Коласа", "Беларускія аўтары на кніжнай паліцы", "Залатыя фаліянты Беларусі". Тут можна было ўбачыць лепшыя творы беларускіх песняроў, літаратуру пра іх жыццё і творчасць, выдатныя творы сучаснай і класічнай айчыннай мастацкай літаратуры. Увазе наведвальнікаў выставы таксама былі прапанаваны выданні-пераможцы конкурсу "Мастацтва кнігі Беларусі" за апошнія гады.
Выстава дазволіла работнікам бібліятэкі наладзіць новыя кантакты для далейшага дзелавога супрацоўніцтва.








































