
Летнія канікулы з карысцю: інтэрактыўныя мерапрыемствы ў бібліятэцы для дзяцей
- Details
- Створана 04.07.2024 09:47
У дні летніх канікулаў Віцебская абласная бібліятэка аб'ядноўвае дзяцей, каб у гульнявой форме развіваць цікавасць да чытання і кніг.
Аддзел маркетынгу і сацыякультурнай дзейнасці правёў для выхаванцаў летніх лагераў цыкл тэматычных заняткаў, прысвечаных важным юбілейным датам года – 1050-годдзю заснавання Віцебска, 95-годдзю Віцебскай абласной бібліятэкі, 80-годдзю вызвалення горада ад нямецка-фашысцкіх захопнікаў, а таксама Году якасці, аб'яўленага ў Беларусі.
У 2024 годзе Віцебск адзначае свой 1050-ы дзень нараджэння. Гісторыкі да гэтага часу спрачаюцца пра сапраўдную дату заснавання горада. У размове з вучнямі малодшых класаў абмяркоўваліся факты і легенды заснавання Віцебска. Творча выказаць стаўленне да сваёй малой радзімы дзеці змаглі, ствараючы віншавальныя паштоўкі з відамі любімага горада.
У час тэматычнага занятку «Бібліятэка без тайн» школьнікі пазнаёміліся з працэсам работы бібліятэкі, парадкам размяшчэння і захоўвання кніг, умовамі рэгістрацыі чытачоў. Героі мультфільмаў дапамаглі запомніць правілы выдачы і вяртання выданняў.
Бібліяквіз «Любімы горад» уключаў 5 тураў – «Гісторыя Віцебска: скрозь 1050 гадоў», «Свабодны горад: 80-годдзе вызвалення Віцебска», «Памяць і помнікі», «Год якасці: брэнды горада для ўсёй планеты», «Культурная сталіца». Пытанні і заданні былі накіраваныя не толькі на праверку ведаў, але і на развіццё лагічнага мыслення, уменні працаваць у камандзе і прымаць рашэнні.
Правядзенне сустрэч у інтэрактыўным фармаце з выкарыстаннем рэсурсаў абласной бібліятэкі сфармавала ў дзяцей пазітыўнае і зацікаўленае стаўленне да вывучэння гісторыі і культуры горада, а таксама разуменне неабходнасці развіцця сваіх інтэлектуальных здольнасцей, творчага мыслення і агульных ведаў.


































