
Вечар-успамін «Афганские дороги Валерия Марченко»
- Details
- Створана 12.09.2024 07:36
Вечар-успамін «Афганские дороги Валерия Марченко» да 70-годдзя з дня нараджэння воіна-інтэрнацыяналіста, гвардыі падпалкоўніка, пісьменніка адбыўся 10 верасня ў бібліятэцы.
Валерый Рыгоравіч Марчанка двойчы, – у 1979–1981 і 1987–1989 гады, – прымаў удзел у баявых дзеяннях у Рэспубліцы Афганістан. Быў узнагароджаны двума ордэнамі Чырвонай Зоркі, ордэнам Чырвонай Зоркі Рэспублікі Афганістан, 26 медалямі. Член Саюза пісьменнікаў Беларусі. Аўтар цыкла кніг афганскай тэматыкі: «Афган: разведка ВДВ в действии» (2005), «Вектор Афган» (2008), «Афган: там, где небо касается гор» (2008), «Афганский разлом. Истоки мирового терроризма» (2017), «Афган: разведка ВДВ в действии. Мы были первыми» (2018) і мастацка-гістарычнага рамана «Калинов мост» (2020).
Валерый Марчанка неаднаразова выступаў у Віцебскай абласной бібліятэцы на разнастайных мерапрыемствах, праводзіў тут прэзентацыі сваіх кніг. Быў частым госцем і ў установах адукацыі горада.
Сваімі ўспамінамі пра Валерыя Марчанку, яго курсанцкія гады ў Разанскім гвардзейскім вышэйшым паветрана-дэсантным ордэна Суворава двойчы Чырванасцяжным вучылішчы падзяліліся воіны-інтэрнацыяналісты Міхаіл Лаас і Мікалай Андрайчук. Пра афганскія дарогі Валерыя Марчанкі расказаў яго сябар, воін-інтэрнацыяналіст Павел Назараў. Добрыя словы пра Валерыя Марчанку, выдатнага афіцэра, чалавека з актыўнай грамадзянскай пазіцыяй, сказалі старшыня абласной арганізацыі ветэранаў вайны ў Афганістане Валяр'ян Мацкевіч, старшыня абласной арганізацыі ветэранаў дэсантных войск і сіл спецыяльных аперацый Вячаслаў Белавус, воін-інтэрнацыяналіст Аляксандр Кліцуноў. Член Саюза пісьменнікаў Беларусі, доктар філалагічных навук Алена Крыклівец расказала пра Валерыя Марчанку як таленавітага празаіка.
Старэйшая дачка Валерыя Марчанкі Святлана Сакалова падзялілася старонкамі сямейнага фотаальбома, расказаўшы пра іх сям'ю, пра дзяцей і ўнукаў Валерыя Рыгоравіча, яго захапленні, вялікую грамадскую дзейнасць.
На працягу вечара гучалі песні ў выкананні Вячаслава Белавуса, Юрыя Паўлюка, удзельнікаў вакальных груп «Гукі ветра» сярэдняй школы № 46 і «Смайл» сярэдняй школы № 47 г. Віцебска.


































