
Краязнаўчыя сустрэчы. Прэзентацыя кнігі Таццяны Івановай «Очерки по истории Витебского края»
- Details
- Створана 20.12.2024 09:49
Прэзентацыя кнігі «Очерки по истории Витебского края» дацэнта кафедры правазнаўства і сацыяльна-гуманітарных дысцыплін Віцебскага філіяла Міжнароднага ўніверсітэта «МІПСА», кандыдата гістарычных навук Таццяны Івановай прайшла ў абласной бібліятэцы 19 снежня ў рамках цыкла «Краязнаўчыя сустрэчы».
Таццяна Іванова спецыялізуецца на вывучэнні дзяржавы і права Беларусі, а таксама даследуе гісторыю прафсаюзнага руху і Віцебшчыны. Першая частка яе нарысаў была апублікавана ў 2015 годзе. Кніга «Очерки по истории Витебского края» прымеркавана да 1050-годдзя Віцебска і ўключае 50 нарысаў, напісаных аўтарам за апошнія дзесяць гадоў.
Падчас прэзентацыі Таццяна Пятроўна расказала пра свае першыя крокі ў краязнаўстве і пра тое, як фарміраваліся тэмы для яе кніг «Деятельность местных органов управления Витебской губернии в октябре 1917 – марте 1924 гг.» (2011) і «Проблема беженцев в Витебской губернии периода Первой мировой войны и последующих лет (Беларусь, 1914–1924)» (2016). Яна падрабязна спынілася на змесце «Очерков по истории Витебского края», надаўшы асаблівую ўвагу найбольш цікавым для яе героям і тэмам.
Намеснік дырэктара Дзяржаўнага архіва Віцебскай вобласці Таццяна Буевіч адзначыла дбайную і карпатлівую работу Таццяны Івановай з архіўнымі матэрыяламі.
Сваімі думкамі аб важнасці і значнасці краязнаўчых даследаванняў для больш поўнага асэнсавання багатай духоўнай спадчыны нашай краіны і яе выдатных асобаў падзялілася дырэктар абласной бібліятэкі Таццяна Адамян.
У бліжэйшы час новая кніга па краязнаўстве Віцебшчыны будзе даступна ў фондзе бібліятэкі.


































