
Выстава сцэнаграфіі Дзмітрыя Гаралевіча
- Details
- Створана 03.06.2026 09:16
У сцэнаграфіі Дзмітрыя Гаралевіча, мастака-канструктара, пастаноўшчыка Беларускага тэатра «Лялька», яскрава праявіўся індывідуальны почырк, уласнае бачанне пастановак, іх задум.
Эскізы Гаралевіча – гэта не проста прадстаўленыя на паперы схематычна распрацаваныя праекты, а сукупнасць уласных разважанняў і перажыванняў. У рабоце над эскізамі бачны аўтарскі падыход жывапісца і майстра дэкаратыўна-прыкладнога мастацтва. Кожны з яго малюнкаў з'яўляецца завершаным мастацкім творам, гатовым да экспанавання.
На выставе «Па той бок...» прадстаўлены эскізы сцэнаграфіі, эскізы касцюмаў да пяці спектакляў віцебскага тэатра «Лялька»: «Ох і залатая табакерка», «Лялькі Ціма Талера, або Прададзены смех», «Чарамара», «Мой вялікі маленькі Дзядуля», «Сцежкі добрых сустрэч».
Беларускае традыцыйнае ткацтва натхніла мастака на стварэнне арыгінальных дэкарацый да спектакля «Ох і залатая табакерка», заснаваных на аўтарскай тэхніцы пляцення і тэкстыльнай аплікацыі. Адной з галоўных задач пастаноўшчыка з'яўляецца пагружэнне гледача ў атмасферу, напоўненую беларускімі этнічнымі, фальклорнымі і гістарычнымі матывамі.
«Я імкнуўся паказаць, што беларусы маюць сваю ўнікальную культуру, гісторыю і традыцыі. Усе дэкарацыі разам – гэта такі стылізаваны абрад беларускага краю, этнічны космас, у якім жывуць героі казкі».
Атмасферным і выбітным атрымаўся спектакль «Лялькі Ціма Талера, або Прададзены смех». Дзмітрый Гаралевіч аўтарскімі мастацкімі сродкамі выразнасці данёс гледачу павучальную гісторыю пра барона Троча, беднасць, багацце, марскія падарожжы і прыгоды галоўнага героя.
Сцэнаграфія, касцюмы, лялькі, якія былі прыдуманы мастаком да спектакля «Чарамара», адлюстроўваюць асноўную тэму эстонскай казкі – гэта гармонія, яднанне чалавека з прыродай і навакольным светам. Касцюмы па каляровай гаме вельмі стрыманыя і адначасова па-народнаму прыбраныя.
Лірычнымі і кранальнымі выйшлі эскізы да пастаноўкі «Мой вялікі маленькі Дзядуля». Чароўны свет фантазіі дзіцяці Дзмітрый паказаў з дапамогай шматслойных рознакаляровых фактур і тэкстур прадметаў, нязвыклых матэрыялаў, маштабных лялек і яркіх колераў.
У эскізах да дзіцячага спектакля «Сцежкі добрых сустрэч» вельмі карпатліва аўтар падыходзіць да перадачы характараў герояў. Галоўныя героі – жывёлы і неадушаўлёныя прадметы. Прыём ачалавечвання звяроў і прадметаў выкарыстоўвае Д. Гаралевіч для стварэння яркіх і выразных вобразаў. Яны ў мастака не толькі апранутыя як людзі ў чалавечыя касцюмы, але і ходзяць, сядзяць як людзі, ды і характары ў іх чалавечыя, ёсць сярод іх добрыя, разумныя, баязлівыя, адважныя.
Для сцэнаграфіі сучаснага лялечнага тэатра вельмі важнымі з'яўляюцца індывідуальнасць мастака, яго почырк у сцэнічным творы, погляд на сусвет. Аўтарскі падыход мастака Дзмітрыя Гаралевіча да сцэнаграфіі змяняе не толькі сцэнічную прастору, але і наўпрост уплывае на ўсе складнікі яго спектакляў.
Выстава сцэнаграфіі «Па той бок...» мастака Беларускага тэатра «Лялька» Дзмітрыя Гаралевіча прадстаўлена ў галерэі 1-га паверха Віцебскай абласной бібліятэкі з 2 па 30 чэрвеня 2026 года.
Таццяна Гаралевіч, магістр мастацтвазнаўства


































