
Выстава-прагляд «Духоўных кніг боская мудрасць»
- Details
- Створана 13.03.2025 13:13
10 сакавіка, напярэдадні Дня праваслаўнай кнігі, у аддзеле рэдкай кнігі бібліятэкі адкрылася выстава-прагляд рарытэтных праваслаўных выданняў «Духоўных кніг боская мудрасць».
14 сакавіка – Дзень праваслаўнай кнігі ў Беларусі. Свята адзначаецца з 2011 года і прымеркавана да выдання ў 1517 – 1519 гадах Францыскам Скарынай першай на ўсходнеславянскіх землях друкаванай Бібліі, а таксама да выпуску ў 1564 годзе выхадцамі з беларускіх зямель дыяканам Іванам Фёдаравам і Пятром Мсціслаўцам «Апостала» – першай друкаванай кнігі ў Маскоўскім царстве.
Аднымі з першых выставу-прагляд наведалі навучэнцы Віцебскага дзяржаўнага тэхнічнага каледжа. Маладыя людзі змаглі пазнаёміцца з рэдкімі праваслаўнымі выдяннямі ХІХ стагоддзя і факсіміле кніжных помнікаў, сярод якіх «першакніга» беларусаў – Полацкае Евангелле (XII ст.), унікальны ўзор мастацтва жывапісу і каліграфіі XIV стагоддзя – Кіеўская Псалтыр, адна з праваслаўных святыняў Беларусі – Слуцкае Евангелле (XVI ст.) і многія іншыя.
Наведвальнікі пашырылі свае веды аб гісторыі славянскай пісьменнасці і праваслаўнай кнігі, змаглі патрымаць у руках арыгінал старажытнага Часоўніка, пагартаць старонкі рарытэтных выданняў.
Запрашаем усіх аматараў кнігі на выставу-прагляд «Духоўных кніг боская мудрасць», якая працягнецца да 20 сакавіка.


































