
Праект «Міфалогія роднага краю»
- Details
- Створана 28.03.2025 15:44
Міфалогія – гэта своеасаблівы ключ да разумення нацыянальнай ідэнтычнасці, гісторыі і традыцый народа.
Аддзел рэдкай кнігі сумесна з аддзелам маркетынгу і сацыякультурнай дзейнасці абласной бібліятэкі падчас вясновых канікул прапанавалі вучням сярэдніх школ Віцебска глыбей усвядоміць культурную спадчыну сваёй краіны, а таксама даведацца пра вытокі сюжэтных ліній літаратурных і мастацкіх твораў.
Праект «Міфалогія роднага краю» стартаваў з адкрыцця выставы «Дзівосны свет беларускіх міфалогіі» ў выставачнай зале «Ex Libris». Дзеці пазнаёміліся з незвычайнымі і цікавымі міфалагічнымі персанажамі, створанымі таленавітымі рукамі майстроў народных мастацкіх рамёстваў Віцебшчыны. Яркія друкаваныя выданні з мастацкімі творамі беларускіх пісьменнікаў, у аснову якіх былі пакладзены фальклорныя сюжэты, сталі сапраўдным падарожжам у міфічны свет, поўны таямніц і загадак.
Падчас пазнавальна-гульнявой праграмы «Свет таямнічага вогнішча: падарожжа ў краіну беларускіх міфаў» вучні даведаліся пра характары, звычкі і манеры каларытных фальклорных герояў, якія жылі побач з нашымі продкамі – ў дамах, палях, лясах, азёрах і балотах.
На занятках у творчай майстэрні «Героі міфаў і легендаў Беларусі» ў дзяцей была магчымасць стварыць свайго ўласнага героя – Вужынага цара! Гэты вялізны змей з залатой каронай мудра кіруе ўсімі паўзунамі і ахоўвае падземныя скарбы.
Праект працягне працу да 30 чэрвеня і запрашае чытачоў абласной бібліятэкі зазірнуць у загадкавы свет беларускай міфалогіі.


































